Loto Palēmia ‘o Ha’amoa ke fakahoko ange Sipoti 2019 ki Ha’amoa ^Featured

Ko hono tali ‘eni ‘e he Palēmia Ha’amoa ‘i ha’ane tohi ki he Kosilio Sipoti ‘a e Pasifiki ‘i he ‘aho 30 Sune 2017 hili ia ‘a e mahino ‘oku holomui ‘a Tonga mei he fatongia mamafa ko’eni.

Na’e fakahā foki ‘e Tuilaepa Sailele Malielegaoi ‘oku talitali lelei ‘e hono fonua ‘a e Sipoti makatu’unga ‘i he’ene lelei ki he fonua, kakai mo e to’utupu hono fonua.

‘I he fakamatala ‘a e Samoan Observer, na’e fakamahino ‘e Tuilaepa Sailele Malielegaoi ‘a ‘ene poupou ki he Sipoti 2019 he koe tokotaha sipoti ia pea ‘ikai ngata ai ka ‘oku fakakaukau ke toe kau atu ki he sipoti 2019.

Na’e kau foki ‘a Tuilaepa Sailele Malielegaoi ki he timi fana ngahau ‘a Ha’amoa ‘i he Sipoti 2007 pea na’a ne fakahua ki he Kosilio ‘i heene tohi ‘e toe kau atu ke fakafoki mai ‘a e metali koula na’e totonu kene ma’u ‘u he ta’u 2007.

Kaikehe kuo mahino ‘a e halanga ia ‘o e Sipoti Pasifiki 2019 ‘e ngali fakahoko ia ki Ha’amoa.

Na'e 'ikai foki ke tali 'e Fisi ke fakahoko ange kiai 'a e Sipoti Pasifiki 2019 makatu'unga pe he nounou 'a e taimi.

‘I he taimi tatau ‘oku lolotonga lele ‘a e ngāue ki he fakatonutonu fakalalo ‘i he vaha’a ‘o e Pule’anga Tonga mo e Kosilio Sipoti ‘a e Pasifiki makatu’unga ‘i hono maumau’i ‘e Tonga ‘a e Aleapau Sipoti.