Huufi ‘e he ‘Ene Afio Tupou VI Fe’auhi Judo ‘a e Vahenga Ocenia ^Featured

Ko e fe’auhi ‘aho 2 foki ‘eni ‘a ia ko e ’aho ni ‘aho 28 mo e ‘aho ‘a pongipongi ‘aho Tokonaki 29 ‘Epeleli.

Ko hono fuofua fakahoko mai ‘eni ‘a e fe’auhi ni ki Tonga ni pea ‘oku kau lelei foki ‘eni ki he teuteu atu 'a e fonua ki he Sipoti ‘a e Pasifiki ‘i he 2019.

Na’e kau foki ‘a ‘Ene ‘Afio Tupou VI ‘i he toko 6 na’a nau fuofua kamata ‘a e sipoti ni ‘i he ta’u taha-hiva valungofulu tupu.

‘Oku kau mai foki ki he fe’auhi ni ‘a e kau Judo lelei taha ‘o e vahenga Oceania fakatatau ki he fakamatala ‘a e Palesiteni ‘o e Union Judo 'a Ocenia ‘i he polokalama huufi.

'Ikai ngata ai ka ‘oku kau mai foki kiai mo e kau Judo laka hake he toko 130 pehe ki he kau poupou mo e kau ‘ofisiale ‘oku laka hake ‘i he toko 200.

‘I he Tō Folofola ‘a ‘Ene ‘Afio na’a ne fakamamafa’i ‘a e mahu’inga ‘o e sipoti ki he mo’ui lelei ‘a e kakai pehe ki hono talitali lelei ‘a e fakahoko mai ki Tonga ni ‘a e fe’auhi mo e mahu’inga hono langa mo hono fakalakalaka'i ‘o e sipoti ‘i he fonua.

Fakatatau ki he fakamatala ‘a e Palesiteni ‘a e ‘Iunioni judo ‘a Tonga Lennie Nitt ‘oku ‘i ai ‘a e faka’amu ke fakahoko ma’u mai pe ki Tonga ni ‘a e fe’auhi fakavaha’a pule’anga pea ke hoko ‘a Tonga koe kolomu’a ‘o e Judo ‘i he vahenga Ocenia.