Tali fetongi ki he Polokalama Sipoti 2019: Fana (Shooting) mo e Lova-Vaka (Sailing) ^Featured

Na’e pehe ‘e he Sekelitali Seniale ‘o e TASANOC, Takitoa Taumoepeau ko e ngaue faingata’a eni hili ko ia hono ‘osi tali ‘e he Fakataha Lahi ‘o e 2012 ‘a e tohi kole (Bid Document) ‘a Tonga ki he Sipoti 2019 mo e polokalama sipoti ‘e 26. Pea na’e ‘osi fakamo’oni hingoa foki ‘a Tonga (TASANOC mo e Pule’anga Tonga) pea mo e Kosilio Sipoti ‘a e Pasifiki ki he Tohi Aleapau ‘o e Sipoti ‘i Wallis & Futuna he 2012. Koe’uhi kuo ‘osi tali ‘a e sipoti ia ‘e 26 he’ikai lava ai ha tanaki atu ka ko e fokotu’u pe ke fetongi pea kei nofo pe he sipoti fakakatoa ‘e 26.

Kaekehe, na’e fakahoko foki hono vakai’i (review) ‘e he Komiti Sipoti ‘a e Kosilio ‘a e ngaahi polokalama sipoti hili ‘a e Sipoti ‘i Papua Niukini he ta’u kuo ‘osi pea na’e makatu’unga ai ‘a e fokotu’u atu mei Tonga koe’uhi pe ko e tu’unga ‘o e ongo sipoti na’e tomu’a ‘i he polokalama (baseball mo e softball) ‘oku ‘ikai ke malohi pea ‘ikai foki ha Komiti Sipoti fakafonua ia ki ai.

Na’e pehe ‘e Takitoa na’e fengaue’aki leva ‘a e Komiti ke fakalele ‘a e Sipoti 2019 (2019 Organizing Committee) mo e TASANOC ke vakai’i ‘a e ongo sipoti ko ia ‘e 2 ke fetongi’aki ‘a e Baseball mo e Softball. Na’e tali leva ‘a e sipoti Fana (Shooting) pea moe Lova-vaka (Sailing).

Na’e fokotu’u atu leva eni ki he Komiti Sipoti ‘a e Kosilio lolotonga ‘a e fakataha na’e fakahoko ‘i he Gold Coast ‘i Novema ‘o e ta’u kuo ‘osi pea na’e pehe ‘e he Poate Pule ‘a e Kosilio ke tepile’i eni ki he Fakataha Lahi ‘a e Kosilio he ta’u ni.

Ko e ongoongo fakafiefia eni ki he ongo sipoti ‘e 2 kuo fetongi mai pea ‘e fai leva ‘a e fengaue’aki vaofi mo e ongo Komiti Sipoti Fakafonua ko eni ke fakapapau’i ‘a e malava mo e tu’unga ma’olunga ‘o e fe’auhi ki he 2019.

Na’e lava lelei ai pe mo e fakahoko atu ‘e he Sekelitali Seniale (ma’a e TASANOC mo e Komiti Fakalele ‘o e Sipoti (Organizing Committee) ‘a e lipooti fakamuimui (Progress Report) ‘o e teuteu mo e ngaue ‘oku lolotonga fakahoko ‘e Tonga ‘i he hanga atu ki he Sipoti ‘o e 2019.

Ko e Fakataha Lahi ‘a e Kosilio Sipoti ‘a e Pasifiki ‘o e 2016 na’e hoko atu ia hili ‘a e Fakataha Lahi ‘a e Komiti Sipoti ‘Olimipiki ‘a e Oceania ‘oku lolotonga fakahoko ‘i Port Vila, Vanuatu. Ko e kau fakafofonga mei he TASANOC, ko e Palesiteni, Lady Tu’ivakano, Sekelitali Seniale, Takitoa Taumoepeau (‘a ia ko e memipa ‘o e Organizing Committee) mo e Pule ‘o e Timi Sipoti ki he Olimipiki ‘i Rio, Mike Bloomfield. Pea mei he Komiti Fakalele ‘o e Sipoti 2019 (Organizing Committee) ko e Sea, Lord Sevele pea mo e memipa he Komiti mo e Palesiteni maloloo ‘o e TASANOC, Lord Tupou.