Fengaue’aki Pule’anga mo e Poate ‘Akapulu ‘a Mamani ke Fakalelei’i ‘Akapulu ‘a Tonga Featured
Nuku’alofa, 13 ‘Epeleli 2016. Kuo fakahoko ‘e he Pule’anga ‘o fakafou ‘i he Palēmia ‘Akilisi Pohiva ha alelea mo e Poate ‘Akapulu ‘a Mamani kenau fengāue’aki fakataha ke fakalelei’i ‘a e palopalema ‘oku hoko ‘i he ‘Iunioni ‘Akapulu ‘a Tonga.
Ko hono fakahā ‘eni ki he ngaahi mitia ‘a e fakataha ‘a e kau ‘ofisiale mei he Poate ‘Akapulu ‘a Mamani ‘a ia na’a nau lava mai ki Tonga ni mo e Palēmia ‘o fakahoko ‘a e alelea ko’eni. Kuo mahini mai foki ‘oku fai ‘a e felotoi ka ‘oku lolotonga fakahoko e ngāue kiha aleapau ‘a e ongo fa’ahi ‘a ia ko’ene lava ‘eni pea ‘e toki tukuange mai leva ‘a e tokoni faka-pa’anga ki he ‘akapulu ‘a Tonga ni.
‘Oku kei mo’ua foki ‘a Poate ‘Akapulu ‘a Tonga talu mei he ta’u 2011 pea na’e kamata ‘i Sanuali ‘o e ta’u ni 2016 ‘a hono ta’ofi hano toe tukuange mai ha pa’anga ki he ‘Iunioni ‘Akapulu ‘a Tonga mei he Poate ‘Akapulu ‘a Mamani.
Ko e lava mai 'eni 'a kau 'ofisiale mei he Poate 'Akapulu 'a mamani 'oku lolotonga fakahoko e fetukuaki 'i he vā 'o e Palesiteni fo'ou 'o e 'Iunioni 'Akapulu 'a Tonga Fe'ao Vunipola pea mo e Palesiteni mo e CEO malōlō 'Epelei Taione mo Fuka Kiteikei'aho 'i he tu'unga 'oku 'i ai 'a e ngaahi mo'ua 'o e 'Iunioni 'Akapulu 'a Tonga.
Ko e ongoongo mahu'inga ia heni ko hono fakalelei'i leva 'a e palopalema ko'eni 'i he 'Iunioni kae hoko atu.
