'Uhinga Ta'ofi Fakataimi e Tokoni Fakapa'anga 'a e World Rugby ki Tonga ^Featured

 Na’e talu mei Sanuali 2016 hono ta’ofi ‘e he WR ‘enau tokoni fakata’u ki he fakalele e ‘akapulu pea pehe ki he vahe ‘a e kau ngaue kotoa. Koe ‘uhinga lahi foki e ta’ofi fakataimi ko ‘eni koe ta’e fiemalie ‘a e WR ki he founga fakalele e ‘akapulu he taimi ni. Ka ‘oku ‘ikai koe mo’ua  ‘o e TRU, hange koia ‘oku tala ki mamani ‘e he Palesiteni e ‘akapulu ‘a Tonga.

Ko Fisi mo Ha’amoa ‘oku lahi ange ho’ona mo’ua ‘i Tonga ni, ka ‘oku na ‘osi ma’u ‘ena ua ‘a e tokoni fakapa’anga ‘a e WR ki he 2016. Koe ngaahi mo’ua e ngaahi ‘Iunioni ‘Akapulu koe me’a pe ia ‘anautolu (sovereignty issue). Pea ‘oku ‘ikai ke manavasi’i e WR ia na’a to’o ha silini ‘o totongi ’aki ha mo’ua he ‘oku malu ‘aupito ‘enau pa’anga ‘a nautolu. Hange ko Tonga ni, ‘oku tukumai kotoa pe ‘enau pa’anga ‘anautolu ki he ANZ Bank ki he ‘enau ‘akauni pauni ( pa’anga Pilitania). Pea ‘e toki tukuange mai pe ia ke fai ha totongi mo’ua,  ka loto ki ai e WR. Koe pa’anga foki ‘a e WR ‘oku tokonga’i ia mei tu’a ‘e ‘Aloma Johasson mo ‘ene Kautaha.  Koe fakamo’oni sieke koe High Performance  Manager pea mo ‘Aloma Johansson. ‘Ikai ke kau ki ai e CEO ‘a e TRU ia. Sai kapau ‘oku malu pehe ‘e pa’anga ‘a e WR, koe ha leva e ‘uhinga ‘oku ‘ikai ‘omai ai ‘enau tokoni ki Tonga ni? ‘Ikai ‘oku ‘i ai e ‘uhinga kehe ia?

KOE NGAAHI ‘UHINGA ‘OKU TA’OFI FAKATAIMI AI E PA’ANGA ‘A E WORLD RUGBY.

-‘Uluaki pe, koe ngaahi liliu ‘oku fakahoko ‘e he ‘Iunioni he taimi ni ‘oku ‘ikai ke loto lelei pe fenapaasi moe fiema’u ‘a e WR.

-Ua, koe ngaahi Good Governance Principles na’e tukumai mei he Oceania, ‘a ia koe va’a ia e WR ‘oku ne tokanga’i e ‘akapulu he Pasifiki, na’e fiema’u ia ke tali ‘e Tonga ni kimu’a he Tisema 2015, ‘oku te’eki ai ke tali ‘eni ‘e he TRU.

Teu lave ki he ‘uluaki ‘uhinga.  ‘Oku kau ki heni hono tuku kitu’a mo hono fakahu mai ki loto e kau ngaue. Koe kau ngaue ‘oku vahe mei he WR ‘oku ‘i ai ‘enau Konituleki pea ka tuku ha taha ki tu’a ‘e he TRU ‘oku fiema’u ia ‘e he WR kenau kau mai ki hano review ‘enau ngaue pea toki fai ha tuku ki tu’a kapau na’e ’ikai ma’u e ngaahi taumu’a ‘oku ha he’ene konituleki. “I he tafa’aki e fakahu e kau ngaue fo’ou, kuopau ke kau ki ai e WR pea kuopau ke tu’uaki pea pehe ki he interview. 

Koe ngaahi me’a ko ‘eni ‘oku ou fakaha atu ‘i ‘olunga, ‘oku ‘ikai ke fai ki ai e Pule ‘oe TRU he taimi ni.  Koe me’a leva  ‘oku manavasi’i ki ai e WR koe ngaahi ‘eke fakakonituleki e ngali fai ‘e he kau ngaue ‘oku tuku ki tu’a. Ua, koe fakahu fakapone e kau ngaue ki loto, ‘oku ‘ikai ke nau fie fakamole ai ‘enau pa’anga he ‘oku ‘ikai ke nau kau ai, ke fakapapau’i koe kakai totonu pea ko ‘enau pa’anga tene hanga ‘o langa hake e ‘akapulu he fonua ni.

Na’e ‘osi fai e tu’utu’uni ‘a e Pule moe Poate ke tuku ki tu’a ‘a e High Performance Manager (tama fakamo’oni sieke) kae fetongi ‘e he tama local. Na’e ‘ikai foki ke tali ‘e he WR e fo’i fetongi ko ‘eni, koe ta’e kualifai e motu’a local ki he tu’unga mahu’inga ko ‘eni. Koe motu’a High Performance foki koe motu’a Palofesa mei Sydney, Australia he tafa’aki Sport Science. Pea ko hono tuku kitu’a ta’e fai hono review ‘oku ‘ikai koe due process pe Good Governance pea ‘oku ‘ikai loto lelei ki ai e WR. Koe‘uhi kuo tuku e motu’a fakamo’oni sieke  ki tu’a pea ‘oku tailiili leva e WR hono ‘omai ‘enau pa’anga ke fakalele ‘e he kakai hu noa’ia pea ‘oku ’ikai kenau ma’u e tu’unga fakaako.

Koe ‘uhinga hono ua, koe taha ia e me’a na’e feinga lahi mai ki ai e WR talu mei he 2012, ke fakalelei’i e Good Governance ‘o e Unioni. ‘Uluaki, ‘oku tupu ‘eni mei he fetokaki holo e ngaahi pule ‘a e Poate hono fakalele e ‘akapulu, ‘o lahilahi ange pe ‘a e feinga e kau Poate ia ‘e ni’ihi ke kumi ha’anau ‘eva he ngaahi tua ki muli ‘etau timi ‘akapulu, kae ‘ikai ke fai honau fatongia koe taki mo fakalele lelei e ‘akapulu - fiema’u ke ‘oua te nau kau he tafa’aki  fakatekinikale ‘o e ‘akapulu. Ua, ‘oku lahi e kau noa’ia e Poate hono fakalele faka’aho e ‘akupulu. Tolu, koe toutou mafulifuli fakata’u fa e ‘akapulu ‘Tonga ni. He ‘oku ne fakatupu ‘e ia e kamata fo’ou he taimi kotoa pe pea ‘oku ha pe ‘eni he tu’unga ‘oku ‘I ai ‘etau Ikale Tahi.

 ‘I Tonga ni ‘oku te’eki ke teemi ua ha Poate pea pehe ki he kau ngaue.  Na’e fai foki ‘eni ‘e Nu’usila pea nau ma’u ai e fe’auhi World Cup. Ko ia ai na’e ngaue leva e WR ‘o fakafou mai he Oceania Rugby ke fa’ufa’u pea ‘ave ki Fisi, Tonga mo Ha’amoa ke nau tali e ngaahi Governance Principles kimu’a ‘i Tisema 2015. ‘Oku ngali fakamalohi ‘eni ka ‘oku ou tui ‘oku taimi pe he ‘oku hange ia ‘oku tau ma tautolu he faitotonu. Na’a ku feinga ke fakalelei’i e tafa’aki ki he Good Governance ‘aki hono tuku ki tu’a ha motu’a Poate ‘e taha koe’uhi pe koe ma’u e lipooti mei he folau ‘a e timi fefine ki ‘Aositelelia, na’e ta’e taau hono ‘ulungaanga mo ‘ene fakahoko ngaue lolotonga ‘enau folau. 

Na’a ku toe tuku foki ki tu’a e tehina e motu’a Poate ko ‘eni, na’e faiako he’etau Under 20, koe ‘uhi pe koe ‘ene ngaahi comment na’e fai he web page ‘a e Saracen pea pehe ki he facebook fekau’aki moe anga hono fakalele e ngaahi polokalama e TRU. Koe‘uhi ko ‘ene ngaahi fakaanga ‘e ngali ke ne fakangalikovi’I e ‘akapulu na’e pau ai ke ta’ofi ‘ene faiako. Kaikehe, na’e  hoko e ongo me’a na’aku fai ke kau kovi ki he’eku fai fatongia ki he TRU, he ko au pe na’e ‘uluaki tuku ki  tu’a hili ia hono ma’u ‘ehe motu’a na’e faiako he Under 20 e fili Palesiteni, he Fakataha Fakata’u ‘a e ‘Iunioni.  

Na’a ku feinga ke tali ‘e he Poate he ta’u kuo ’osi e ngaahi Governance Principles na’e ‘omai mei Oceania, ka na’e  fili e Poate ke toe fai pe ha popotalanoa ki ai.  Na’a ku fakamatala’i kia nautolu ‘oku ‘ikai ke toe ‘i ai ha talanga ia ‘e lava ka na’e ‘ikai pe ke fanongo mai ha taha. Pea ‘i he’emau Poate moe Pule fo’ou na’e loto e Palesiteni ke toloi. Ko ‘eku ma’u he taimi ni ‘oku te’eki ke tali ‘eni ‘e he TRU ‘a e ngaahi fokotu’u mai ‘a e Oceania.  ‘A ia kapau ‘e ‘ikai te tau tali, ‘e ngali hoko mai lerva e ngaahi me’a ko ‘eni, to’o ‘etau memipa mei he Oceania pea ‘ikai ke tau kau he’enau ngaahi fe’auhi pea ‘ikai leva ke ma’u ha pa’anga mei he WR.

Mahalo, ‘oku ‘uhinga lelei ange ‘eni ki he ‘uhinga hono  ta’ofi e pa’anga tokoni ‘a e WR, he mo’ua ‘oku taku koe ‘uhinga ia. ‘Oku fiema’u e taki ‘oe TRU ke ne taki ha feinga pa’anga ke hokohoko atu ‘aki ‘e he ‘Iunioni, he koe pisinisi. Koe Pule’anga koe tokoni fakamuimui taha ia, ‘ikai koe koe ‘uluaki.  Ua, ke feinga e Pule moe kau Poate ‘a e TRU ke nau ngaue fakataha moe WR, pea fakafoki e kau ngaue na’e tuku ki tu’a ke fai honau review. Kapau ‘oku faka’ofa ‘ia he ta’evahe e kau ngaue pea kataki a ‘o fakafisi he koe ola pe ‘eni ‘ene ngaue. Na’e tonu pe ke faifaimamalie e Palesiteni, kae fanongo mo talanoa ki he kau ngaue pea pehe ki he WR. He koe 3.4 miliona ‘oku ‘omai ‘e he WR he ta’u, pea ‘oku ‘ikai totonu ke tau fa’ifa’iteliha pe tautolu ia.