Huufi Tama Pilinisi Kalauni 'Ofisi TCC 'i 'Eua

HRH Pilinisi Kalauni Tupou To'a 'Uluakalala

Ko 'e 'ofisi fo'ou foki 'eni pea ko hono langa 'eni hili hano maumau'i 'a e 'ofisi motu'a 'a ia na'e tu'u he matatahi 'Ohonua 'e he tsunami hili 'a e puna 'a e mo'ungaafi Hunga Tonga Hunga Ha'apai 'i he konga kimu'a 'o e ta'u ni.

Na'e 'uluaki maumau'i 'a e 'ofisi 'e he Saikolone ko Gita 'i he ta'u 2018 pea hili hono fakalelei'i na'e toe maumau'i pe 'e he Saikolone ko Haloti 'i he ta'u 2020 pea hoko 'a e tsunami kene fakapapau'i ai kuopau ke hiki mei 'Ohonua ki ha feitu'u 'oku ma'olunga ange pea ke malu mo hokohoko lelei mei ai 'a e faifatongia.

Hon. Dr. Viliami Uasike Latu, Minisita Le'ole'o Potungaue Ngaahi Pisinisi 'a e Pule'anga

Na'e me'a 'i he Katoanga ni mo e  Ta'ahine Pilinisesi Kalauni Pilinisesi Sinaitakala Tuku'aho pehe ki he 'Eiki Minisita Le'ole'o ngaahi Pisinisi 'a e Pule'anga Hon. Dr. Viliami Uasike Latu, Sea Poate Kau Talekita TCC Timote Katoanga pehe ki he kau Talekita mo e kau fakaafe tokolahi.

Fakatatau ki he fakamatala ngaue 'a e CEO 'o e Kautaha Fetu'utaki 'a Tonga Sione Veikoso, na'e laka hake he pa'anga 'e $300,000 'a e fakamole ki he ngaue ko'eni pea koe makamaile fo'ou 'eni ki he kainga 'o e Vahefonua 'Eua.

Kuo fakanaunau'i foki 'a e 'ofisi ni 'aki 'a e ngaahi me'angaue fakaonopooni pea kuo tukupa mo e kautaha ke fakalakalaka'i 'a e sevesi ki he kakai 'o e fonua 'i he taimi mahu'inga ko'eni 'o e fetu'utaki.

Na'e hoko atu ai pe ki he houa 'ilo na'e fakahoko ki he Holo Siasi Katolika pea na'e me'a mai ai pe 'a e Tama Pilinisi Kalauni Tupou To'a 'Ulukalala pehe ki he Ta'ahine Pilinisesi Sinaitakala Tuku'ako ki Tongtatapu he efiafi Tua'pulelulu ai pe.