Tu’unga fakafiemālie pē kau pāsese folau mei Brisbane mo ‘Aokalani Featured
5 Novema, 2020. ‘Oku ‘i he tu’unga fakafiemālie pē ‘a e kau pāsese ‘e 251 na’a nau folau mai ‘i he uike kuo ‘osí mei Brisbane, ‘Aositēlēlia pea mo ‘Okalani, Nu’usila hili ia hono ma’u mai ‘a e ola ‘a honau sivi Covid-19 ‘oku nau hao kotoa pē ‘o ‘ikai ai ha taha ‘e puke.
‘I he lipooti ‘a e Pule Ngāue ‘a e Potungāue Mo’uí ki he Kōmiti Fakafonua ki he Ngaahi Me’a Fakatu’upaké ‘i he ho’atā ‘o e ‘aho ni ‘i he Fale Fakataha’anga Fa’oneluá na’a ne fakahā ai ko e fuofua taimi ‘eni ke ngāue’aki ‘a Makeke ke fakamavehe’i makehe ai ‘a e kau pāsesé.
‘Oku laka hake ‘i he kau pāsese ‘e toko 90 ‘oku lolotonga kolonitini kinautolu ‘i Makeke.
‘I he taimi tatau ‘oku ‘i ai ‘a e fokotu’utu’u ke tu’uta mai ha vakapuna uta pāsese ‘e ua mei ‘Okalani, Nu’usila ‘i he ‘aho 19 ‘o Nōvemá pea mo Brisbane, ‘Aositēlēlia ‘i he ‘aho 24 ‘o e mahina ni.
‘Oku kei tu’u pē foki mo e ngaahi palani ‘a e Pule’angá ki he ngaahi vaka uta pāsese ‘i Tisema mo Sanuali ‘o e ta’u fo’oú. ‘Oku ‘i ai foki mo e fokotu’utu’u ke fakafoki mai mo e fānau ako Tonga ‘i he ‘Univesiti ‘o e Pasifiki Saute (USP).
Na’e fakamālō’ia foki ‘e he Sea ‘o e Fakataha’angá Hon Poasi Tei ka e pehē ki he Minisitā Mo’uí Hon Toketā ‘Amelia Tu’ipulotu ‘a e fengāue’aki fakataha ‘oku fakahoko ‘e he ngaahi kupu fekau’akí mo e ngāue lahi ‘oku nau fakahoko ke hokohoko atu ‘a hono fetukutuku mai ‘a e kakai Tonga ‘oku nau tuku vakā ‘i he ngaahi fonua mulí.
