Kamata 'i Fo'ui 'a e polokalama "Ta Ki he Uho ‘a e Fa’unga Famili" ^Featured

Ko e uho eni e polokalama ‘oku fakalele ‘e Katrina Ma’u Fatiaki ‘o ne pehe ko e ngaahi lea ia ‘ene faiako mo e fale’i ‘ihe polokalama koeni ko Dr Deborah Tillman ‘oku ne tokanga’i ‘a e polokalama ‘a Maxwell ki he matu’a tauhi fanau.

Ko e fefine ko eni, ‘a Dr. Deborah ko e faiako ki he matu’a tauhi fanau mo e fakalakalaka ‘a e ki’i tamasi’i moe ki’i ta’ahine. Ko e tokotaha lea, fa’u tohi, pule lahi pea koia na’a ne fokotu’u ‘a e Senita Ako Fiefia Ma’ae Fanau pe Happy Home Child Learning Centers.

Ko e fefine tatau pe eni na’a ne fokotu’u pea toe pule ‘i he polokalama televisone ‘oku ‘iloa koe America’s Supernanny’ i he Televisone Lifetime.

Na’e fakamatala ‘a Katrina ki he puipuitu’a felave’i mo ‘ene hoko ko e tokotaha kuo ‘osi ma’u laiseni ke hoko koe faiako mo e tokotaha lea ke vaka ai ‘a e polokalama ‘a e tangata ‘iloa ko John Maxwell – ‘aia ko e naunau teu vahevahe mo kimoutolu – mei he polokalama ‘a John Maxwell.

Kapau ‘e toki ‘i ai ha’o taimi pea fekumi ‘i he internet ki he tangata koeni, John Maxwell – ‘oku ‘iloa ‘i he’ene tu’ukimu’a mo mataotao ‘i he ngaue fakataki pea kuo lahi mo e ngaahi tohi kuo ne
fa’u.

‘I hono kamata’i ‘a e polokalama Ta ki he Uhó‘a e Fa’unga Fāmilí‘i he kolo ‘Eiki ko eni ‘a Hon. Alematea Vaha’I he falelotu Hufanga he Kolosi, na’e fakamamafa’i ‘e Hon. Alematea ‘a e
mahu’inga hono kamata’i e polokalama ni ‘i Fo’ui ke tokoni’i mo poupuo ki he matu’a tauhi fanau ‘i he ngaahi fatongia felave’i mo hono ‘ohake pe ko hono tauhi ‘etau fānau.

Na’e pehe ‘e Katrina ko e visone ‘o e polokalama ni ke teu’i pea langa ‘a e ngaahi famili ki he tu’unga ma’olunga mo lelei taha ‘i hotau fatongia moe mafai tauhi ‘o e fanau – koe’uhi ke ma’u
‘e honau hako moe to’utangata ka hoko mai ‘ae faingamalie kotoa pe ke nau a’usia ha kaha’u ‘oku faka-‘Otua.

Ko e famili – ko e konga mahu’inga ia hotau sosaieti - ka kuo uesia – pea ko hotau fatongia ke malu’i mo fakaakeake ‘a e tu’unga ko ia ‘oku ‘i ai hotau ngaahi famili.

‘E toe loloto ange hono vakai’i ‘e he polokalama ko ‘eni “ Ta ki he Uhó‘a e Fa’unga Famili ‘a e ngaahi mahu’inga fakafolofola ‘o e fatongia tauhi ‘o e famili. Vakai pe ‘e anga fefe ‘etau ‘omai
‘a e ngaahi fua ‘o e laumalie ke tau ngaue’aki ko hotau ‘ulungaanga tu’uma’u ia ‘I he’etau tauhi ‘etau fanau – ‘a e ‘ ofa, fiefia, melino, fa’a kataki, angalelei, angavaivai, mo e ta’e konaa pe fa’a
mapule’ia.

Na’e fakamalo ‘a Katrina kia Vanessa Heleta moe Talitha Project ‘i he poupou mai ke ‘inivesi ‘i he polokalama ni, ‘o fakafou ia he polokalama Pacific Women Shaping Pacific Development ‘I he nau polokalama ma’a e tamaiki fefine he Pasifiki pe Pacific Girl program.

Ta ki he Uhó‘a e Fa’unga Famili ‘e fai pea moe fengaue’aki moe Siasi, Potungaue Polisi moe ngaahi kupu fekau’aki ki hono fakalele e polokalama ni.