Fakaa'u tokoni Sosaieti Kolosi Kula ‘a Tonga ki Siesia Featured
Taha 'o e ngaahi famili 'i Siesia
20 ‘Epeleli, 2020. Kuo ‘osi a’utaki atu ‘a e konga lahi ‘o e ngaahi tokoni afa mei he Sosaieti Kolosi Kula ‘a Tonga ki Nukunukumotu, ‘a ia ‘oku tu’u ai ‘a e kolo ko Siesia, hili ia ‘a hono uesia lahi ‘a e motu ni ‘e he Matangi Malohi ko Haloti.
Fakatatau ki he ‘Ofisa ‘oku ne tokanga’i ‘a e tafa’aki ‘o e fakatamaki (Disaster Management Coordinator) mei he Sosaieti Kolosi Kula ‘a Tonga Marika Moala, na’e kamata hono tufa atu ‘o ‘enau ngaahi tokoni afa ‘i he ‘aho Tokonaki 11 ‘o ‘Epeleli ‘a ia ko e ‘osi peia ‘a e ‘aho ‘e taha hili ‘a e Matangi Malohi ko Haloti.
Ko e ngaahi ‘api fakakatoa ‘e 12 na’e tufa kiai ‘a e ngaahi tokoni. ‘A ia ko e ngaahi tokoni na’e lava ‘o tufa ‘i he ‘aho Tokonaki, na’e kau kiai ‘a e tapoleni, naunau haisini, ko e ngaahi sipi kafu, hina ‘utu’anga vai pea mo e tainamu.
Na’e toe fakahoko atu pe foki mo ‘enau tokoni, ‘a ia na’e tufa ia ‘i he ‘aho Monite ‘o e uike ‘e taha 13 ‘o ‘Epeleli. Ko e tokoni ko ‘eni na’e lava ke fokotu’u ai ‘a e ngaahi teniti, foaki mo e ngaahi maama sola kae pehe foki ki he seti naunau me’a ngaahi kai.
‘I he fakamatala ‘a Marika ‘i hono fakama’opo’opo ‘o e ngaahi naunau mo e tokoni na’e fakahoko ki Siesia, na’e ‘i ai ‘a e ngaahi tapoleni fakakatoa ‘e 22, teniti ‘e 9, ko e ngaahi shelter tool kit pe koia ‘oku ngaue’aki ki hono fokotu’u ‘o e tapoleni ‘e 7, ko e ngaahi hina tanaki ‘anga vai (water container) ‘e 56, kane ‘e 15, seti naunau ngaahi kai (kitchen kit) ‘e 14, hygiene kit ‘e 18, ngaahi sipi kafu ‘e 44, maama sola ‘e 18 pea mo e tainamu ‘e 17.
Ko ‘enau tokoni na’e ‘ikai ke ngata pe ‘i Siesia ka na’e kau atu ki ai mo Vahe Hahake ‘o a’u mai ki Pea, kau kiai ‘a Nuku’alofa mo Vahe Loto pea mo ‘Eua. Na’a ne toe fakaha foki ‘oku kei a’u tonu mai pe e kakai e ni’ihi ‘o fakahoko mai ‘enau kole tokoni moe fiema’u vivili ki he’enau ‘ofisi pea moe fetu’utaki mai ‘I he telefoni. Pea ‘oku nau feinga ke fakakakato e ngaahi fiema’u tokoni ko eni ka kuopau pe ke ‘uluaki siofia e maumau ‘e he kau ngaue ‘e Kolosi Kula pea toki foaki e tokoni ‘ofa.
‘Oku fakahoko ‘a e ngaahi tokoni ko ‘eni ‘i he fengaue’aki ‘a e Va’a ki hono Tokangaekina ‘o e Fakatamaki Fakaenatula (NEMO), Caritas, MORDI Tonga Trust mo e Sosaieti Kolosi Kula ‘a Tonga. Ko e ngaahi Kautaha ‘eni ‘oku nau fengaue’aki mo e NEMO ‘i he fevahevahe’aki ‘a e ngaahi tokoni mo e ngaahi feitu’u ‘oku tufa kiai.
