Polokalama Tala Fatongia ‘a e ‘Ōfisi ‘o e ‘Omipatimení ^Featured

Ko e fakataha ni na’e fakataumu’a ia ke toe vaofi ange ‘a e vā fengāue’aki ‘a e ‘Ōfisi ‘Omipatimení mo e ngaahi poate pisinisí ‘a e pule’angá mo e potungāue ‘oku nau fakamalumalu aí ke faka’ai’ai ‘a e ngaahi ‘elemēniti ‘o e pule leleí pea mo toe fakamā’ala’ala ‘a e founga ngāue ‘a e ‘ōfisí.

Fakatatau ki he fakamatala ‘a e ‘Omipatimeni ‘a Tongá ‘Aisea Taumoepeau ‘oku kau ‘a e ngaahi poate pisinisi ‘a e pule’angá ‘i he mafai (jurisdiction) ‘a e ‘Ōfisi ‘Omipatimení.

“Ko e public enterprises ‘oku ‘ikai ke tuhu’i pau mai ia ki he lao ko eni ‘a e ‘Omipatimení, ka ‘oku kau ‘a e ngaahi public enterprises pe ko e ngaahi pisinisi ko ia ‘a e pule’angá ‘i he fa’ahinga (category) ko eni ‘oku ui pē ia ko e organization, ‘a ia ko e mafai ko eni ‘a e ‘Omipatimení ki he ngaahi potungāue ‘a e pule’angá pea tānaki atu ki ai mo e ngaahi organizations ‘o e ngaahi sino ko iá pea toki liliu pē ‘e he laó ko e ngaahi kautaha.”

Na’a ne fakahā foki ko e ngāue tefito ‘a e ‘ōfisí ko ‘ene tu’u vaha’a ‘i he kakaí pea mo e ngaahi potungāue mo e pisinisi ‘a e pule’angá ke tokoni ki ha taha ‘oku ta’e fiemālie ki ha fa’ahinga tu’utu’uni ‘a ha tokotaha ngāue pe ko ha sino ‘oku ‘i ai e mafai ki ai ‘a e ‘Omipatimení.

“’E malava leva ki he tokotaha ko iá ke ha’u ki he ‘Ōfisi ‘o e ‘Omipatimení ‘o lāunga ki ai pea ‘e fai leva e ngāue ‘a e ‘Omipatimení ke fēngāue’aki mo e sino ko iá. Mou fakatokanga’i ko e fēngāue’aki ko iá ko e fēngāue’aki vāofi koe’uhí ke ma’u ‘a e mo’oní pea mo e me’a koi a na’e hoko ‘o tu’unga ai e lotomamahi ‘a e tokotaha ko iá.”

Na’a ne lave foki ki he ngaahi tefito’i fatongia ‘e tolu ‘a e ‘ōfisí ‘a ia ‘oku kau ki ai ‘a hono fale’i (advisory and outreach responsiilities) ha ngaahi sino ‘o hāngē ko e ngaahi pisinisi ‘a e pule’angá ke nau fēngāue’aki mo e ‘ōfisí ‘i ha taimi ‘e fakahoko ai ha fakatotolo pea mo ‘oatu ha ngaahi fokotu’u hili ‘a e fakatotoló ke fakahoko.

- MEIDECC