‘Ikai tukuhau’i koloa tokoni hūmai ki Tonga hili e Mapuna ‘a e Mo’ungaafi Featured
26 Sanuali, 2022. Kuo tali ‘e he Pule’anga ke to’o ‘a e tute mo e tukuhau mei he koloa hū mai koe tokoni ki he fakaakeake ‘a e fonua hili ko’eni ‘a e fakatamaki fakaenatula na’e fakatupu ‘e he mapuna ‘a e mo’ungaafi Hunga Tonga Hunga Ha’apai.
Ko hono tali ko’eni ‘e he Pule’anga ke to’o ‘a e tute ‘e tokoni lahi ia ki he fakaakeake ‘a ew fonua mo e kakai pea ‘e kau atu kiai ‘a e koloa langa pehe ki he koloa me’akai mo e koloa tokoni kotoa ‘oku fekau’aki mo e kakai na’e uesia ‘e he fakatamaki ni.
‘Oku tali foki ‘e he Pule’anga ke faka’ata ‘eni ke lele ‘i he ta’u ‘e 1 pea ‘e toki fakahoko hano vakai’i pe ‘e hoko atu ki hano fakafo’ou pe ‘ikai.
‘Oku ‘i ai pe foki ‘a hono tu’utu’uni fakaikiiki ‘a ia ‘oku ‘i he malumalui ‘o e Potungāue Pa’anga Hū Mai mo e Kasitomu ki he faingamalie ko’eni kuo foaki ‘e he Pule’anga ki he kakai ‘o e fonua pea ‘oku taumu’a ‘eni ke ‘oua ‘e pā’usi’i ‘a e faingamalie ko’eni.
‘Oku mahino mei he nga’unu ko’eni ‘a e Pule’anga ‘a hono tokangaekina ‘a e fakaakeake ‘a e kakai ‘o e fonua mei he faingata’a ko’eni na’e hoko.
