Tu'uta 'aneafi vakapuna mei Nu'usila mo e toko 140 Featured
29 Siulai, 2021. Na'e tu’uta ‘i he efiafi ‘'aneafi ‘a e vakapuna ‘e taha mei Nu’usila mo e kau pāsese ‘e toko 140 tupu. Ko e kau pāsese ko ‘ení ‘oku ‘i ai ‘a e ni’ihi na’a nau fakakaungatamaki ‘i he Polokalama Toli Fua’i’akau pea mo e kau pāsese angamaheni pē.
Fakatatau ki he Pule Lahi ‘a e Potungāue MEIDECC Paula Pouvalu Ma’u, kuo a’u ‘eni ki he 3,000 tupu ‘a e kakai Tonga kuo ‘osi fakafokifoki mai ki Tonga ni, ‘i he polokalama fakafokifoki mai hotau kainga Tonga tuku vakā ‘i he ngaahi fonua mulí talu mei Siulai ‘o e ta’u kuo ‘osí.
‘Oku ‘i ai foki mo e taumu’a ke fakalelei’i mo fakalahi ‘a e ngaahi feitu’u ke fakahoko ki ai ‘a hono fakamavahe’i makehe (quarantine) ‘o e kau pāsesé.
Na’e fakahā foki ‘e Paula, na’e ‘i ai mo e vakapuna ‘e tolu kehe, ‘a ia ko e vaka mei Brisbane, Pangopango pea mo Vanuatu na’e ‘amanaki ke tū’uta mo ia ‘i he mahina ni. Ko e ngaahi vakapuna ko ‘ení, ‘oku toloi kotoa ia ki he ‘aho 25 ‘o ‘Aokosi, ko e ‘aho ia ke tu’uta mai ai ‘a e ngaahi vaka hoko.
‘I he taimi tatau ‘oku kei fakahoko pē ‘a e ngāue ‘a e Pule’angá ki hono tokangaekina ‘a e kāinga Tonga ‘oku nau kei tuku vakā ‘i Fisí.
Polokalama Huhu Malu’i Covid-19
Kuo a’u ‘eni ki he toko 18,712 mei he toko 28,841 na’e ‘uluaki huhu malu’í ‘a e tokolahi ‘o e kakai ‘o e fonuá kuo ‘osi hoani honau huhu malu’i Covid-19. Fakatatau kia Toketa ‘Ana ‘Akau’ola ko e peseti ia ‘e 65 ‘a e ni’ihi na’e ‘uluaki huhú na’a nau toe foki ‘o fakahoko ‘a honau huhu hoaní.
‘I he’ene fakamatalá ko e toko 748 ‘a e ‘avalisi ‘o kinautolu ‘oku huhu malu’i ‘i he ‘aho.
Na’a ne fakahā foki ‘oku kei taimi pē he ko e uike ‘aki ‘eni hono nima ‘a hono fakahoko ‘a e huhu hoaní, ‘a ia ‘oku taumu’a ke ‘osi ki he ‘aho 31 ‘o ‘Aokosi.
- MEIDECC
