Tokoni Potungāue Ako ki he fefononga'aki 'a e fanau ako ^Featured

'Oku toe fakatokanga’i foki mo e uesia faka-‘ekonomika ‘o e COVID-19 ‘oku hā mai mei he ngaahi faingata’a’ia ‘oku fehangahangai mo e ngaahi fāmili pe mātu’a tokolahi, tupu mei he mole ‘enau ngaahi ngāueʹ, pe motuhia fakataimi mo e ngaahi ma’u’anga pa’anga ‘a e fāmiliʹ.

'I he'ene pehe leva kuo tokoni ai ‘a e Potungāueʹ ‘i hono totongi ha ngaahi pasi ke nau fetuku mai ‘a e fānau akoʹ mei he ngaahi kolo takitaha ki he ngaahi ako’angaʹ, ‘o fakahoko tatau pē ‘i Tongatapu, Vava’u, Ha’apai pea mo e ‘Eua foki .

Ko e tokoni ko eniʹ ‘e lele ia ‘o fakafuofua ki ha uike ‘e tolu. ‘Oku tui ‘a e Potungāue ‘e fe’unga pē ‘a e taimi ko eniʹ ke mateuteu ai ‘a e ngaahi fāmiliʹ, ngaahi koloʹ pea mo e ngaahi Kalapu Kava Tongaʹ ke hoko atu hono fetuku mai pe ‘ave ‘enau fānau ki he akoʹ.

Ko hono fe’aveaki ta’etotongi ko eni ‘o e fānau akoʹ, ko e konga ia ‘o e Ngaahi Tokoni kuo fakafou ‘i he Potungāue fekau’aki mo e COVID-19, ke fakapapau’i ‘oku ma’uako pē ‘a e fānauʹ ‘o ‘ikai ha taha ‘e li’aki ko’euhi ko e me’a ni.

‘Oku ngāue’aki foki ‘a e ngaahi pasi lahi ki hono fetuku holo ‘o e fānau akoʹ, ke fakapapau’i pe ‘a e lava ke tauhi ‘a e ngaahi vā mama’o ‘i he nofo fakatokolahiʹ ‘o fakatatau pe ki he ngaahi tu’utu’uni ‘a e Potungāue Mo’uiʹ.

‘Oku hounga ‘aupito ki he Potungāue ‘a e ngaahi tokoni kotoa kuo nimamai’aki ‘e he Potungāue ki he Ngaahi Ngāue Fakalotofonuaʹ, Kolisi Ko Sia’atoutaiʹ, Kolisi ko Tupouʹ pea mo e ngaahi Kautaha Pasi Taautahaʹ, ‘i
hono fetuku mai mo fakafoki ‘o ‘etau fānau akoʹ.

Lolotonga ‘a e kei malu pe hao ‘a Tonga mei he COVID-19ʹ, ‘oku feinga lahi ‘a e Potungāue ke fai hono lelei taha,ʹ ‘i hono ako’i ‘o e silapa ako,ʹ ke fakasi’isi’i pe, ha uesia ‘o e ako ‘a e fānau, pea taimi tatau ‘oku mahino pe ki he Potungāue ‘a e ngaahi fakangatangata moe ngaahi me’afua ki hono malu’i mo e faka’ehi’ehi mei he COVID-19.

‘Oku toe ‘oatu foki mo e kole ki he mātu’a mo e kau tauhi fānau ke mou kataki ‘o fakapapau’i ma’u pe ‘oku ha’u ho’omou fānau ki he ako.