Toe hoko atu fefolau’aki vakapuna MA 60 ‘i Tonga ^Featured

Ko e sēvesi fefolau‘aki vakapuná foki ‘a e hōkonga vavetaha mo leleitaha ki he pule ‘a e Laó, fakaakeake fakavavevave ki he ngaahi fakatamakí, mo‘ui lelei ‘a e Kakaí mo e malu fakafaito‘ó, pea mo e ma’uma‘uluta ‘a e ngaahi fa‘unga fakafonuá ‘i he vaha‘a ‘o Nuku’alofá ‘a ia ‘oku senitā ki ai e ngaahi ivi fakafonua kotoa ‘o Tongá mo hono ngaahi kupú kotoa ‘i hono ngaahi ‘otu motū.

Na‘e aofangatuku e ‘a‘ahí ni ‘aki hono fakamo‘oni ha Aleapau ‘o e Femahino‘aki (Memorandum of Understanding, MOU) ‘i he vaha‘a ‘o e Potungāue Ngaahi Ngāue Lalahi ‘a Tongá pea mo e kautaha AVIC XAC, ‘o fakamahino ai ‘e he ongo fa‘ahí ‘a hona takitaha ngafa ki hono fakakakato e ngaahi fiema‘u ‘a e potungāué tautefito ki hono ma‘u e Setifikeiti Ngofua Folau Uta mo Pasese (Certificate of Airworthiness, COA), ‘a e MA60 ki he Kakaí.

‘Oku kau ki he aleapaú ni ‘a e ‘a‘ahi ki Tonga ha timi ‘o ha kau mataotao fakatekinikale mei he AVIC XAC he māhiná ni kimu‘a he Kilisimasí, ke nau vakai ki he tu ‘unga ‘oku ‘i ai ‘a ‘ene Setifikeiti Faifatongiá (COA).

Talu mei he 2018 na‘e ‘ikai toe fakahoko fatongia pāsese e MA60 ‘e he kautaha ‘oku ne fakalelé, REAL Tonga Ltd., koe‘uhī ko e fiema‘u ke fakakakato e tauhi fakame‘angāue e vaká ke ‘i he leleitahá (maintenance).

‘Ikai ko ia pē, kā na‘e ‘osi mai ki Sune ‘o e 2019 ‘a e Ngofua Folau (COA) uta mo e  pāsese ‘a e vaká ni. Ko e vaká ni foki ‘a e tefito‘i me‘angāue na‘á ne fakafehokotaki ‘a e ngaahi motu ki Tokelaú mo Tongatapú.

Ko e taumu‘a leva ‘o e me‘a ‘a‘ahi ‘a e Minisitaá ko hano kumia ha fetokoni‘aki fakatekinikale, fakangāue, mo fakakomēsiale mo e kautaha AVIC XAC.

Fakatatau ki he kautahá ni, lolotonga ‘enau ‘a‘ahi mai ki Tonga ‘i Sepitema ta‘u ní, ‘oku kei lelei ‘aupito mo fakafiemālie ‘a e tu‘unga ‘oku ‘i ai e vaka MA60. Ka ‘oku kei fiema‘u ke maau ‘a e lēkooti ‘o e tauhi fakame‘angāué (maintenance records), ke poupou‘i ‘aki e vakai ko iá.

Na‘e taki pē foki ‘e he Minisitaá ‘a e folau ki Xi’an, ‘a ia na‘e kau ki ai ‘a e kau ‘ōfisa kehe mei Tonga, ‘o fakakakato lelei ‘aupito ‘a e ngaahi fakatahá mei he ‘aho 18th ki he 21st ‘o Nōvemá.

Na‘e muimui folau foki mo e ‘Amipasitoa ‘o Tonga ki Siainá, H.E. Tau‘aika ‘Uta’atu, kau atu ki ai mo e Palesiteni ‘o e Pacific-China Friendship Association Dr. Hiria Ottino, CEO ‘o e Potungāue Takimamatá, Mr. Sione Moala Mafi, ko e ‘Ofisa ki he Fefononga‘aki Vakapuna Sivile ko Mr. Peni Taimani, mo e ni‘ihi kehe.

Na ‘e talitali māfana kinautolu ‘e he Tokoni Palesiteni ‘o e AVIC XAC pea mo ‘enau toe CEO.

‘Oku fakatu‘amelie ‘a e Minisitaá mo e Potungāué ki hono talitali ‘a e timi mei AVIC ki Tonga, ke fakakakato ‘a e faka‘amu ‘a e Kapinetí, pea mo fakapapau‘i ‘a e kualitī mo e malu ‘a e fefononga‘akí ‘i Tonga.