Tu’uta Me’afaka’eiki ‘Eiki Palēmia ki Tonga Featured
Ta’ahine Pilinisesi Angelika Latūfuipeka Tuku’aho 'i hono talitali 'o e me'afaka'eiki 'i he Mala'evakapuna Fua'amotu
17 Sepitema, 2019. Na’e tu’uta ‘i he Mala’evakapuna Fua’amotu ‘i he ho’atā efiafi ‘o e ‘aho ni ‘a e me’afaka’eiki ‘o e ‘Eiki Palēmia Samuela ‘Akilisi Pohiva.
Na’e fakahā’ele mai foki ‘a e me’afaka’eiki ‘i he vakapuna faka-kautau ‘a e Laulāpuna ‘a Nu’usila pea na’e muimui folau mai ai ‘a e ‘Eiki Sea ‘o e Fale Alea Lord Fakafanua mo e ni’ihi ‘o e kau Minisitā ‘o e Kapineti pehē ki he kau fakafofonga mei he Pule’anga Nu’usila mo e n'iihi ‘o e fāmili ofi ‘o e ‘Eiki Palēmia Samuela ‘Akilisi Pohiva.
Na’e me’a talitali foki ‘i he Mala’evakapuna Fua’amotu ‘a e Ta’ahine Pilinisesi Angelika Latūfuipeka Tuku’aho pehe ki he ni’ihi ‘o e Hou’eiki Nōpele ‘a ‘Ene ‘Afio fakataha mo e Palēmia Le’ole’o Semisi Sika pehe ki he toenga ‘o e kau Minisitā ‘o e Kapineti mo e kau fakaafe fakalangilangi kehe pe.
‘E fakahā’ele ‘a e me’afaka’eiki pea ‘e pō ua ‘i he ‘Ofisi faka-Pule’anga St George pea ‘e fakahoko hono malanga’i ‘i he Falelotu Senituli pea toki fahaha’ele ki he mala’e Telekava ‘i he ‘aho Tu’apulelulu 19 ‘o fakahoko ai hono ouau faka’osi.
