Fakafolau fakafaito’o ‘a e Palēmia ki Nu’usila. Featured
‘Eiki Palēmia, Hon. Samuela ‘Akilisi Pohiva
11 Sepitema, 2019. Kuo tukumai ha ongoongo tukuatu mei he 'Ofisi 'o e Palēmia 'o fakaha ai kuo fakafolau fakafaito’o atu ‘a e ‘Eiki Palēmia, Hon. Samuela ‘Akilisi Pohiva he ho’ata ‘o e ‘aho ni, Pulelulu 11 ‘o Sepitema, ki Nu’usila.
Na’e ‘i Falemahaki Vaiola ‘a e ‘Eiki Palēmia he uike ‘e ua kuo maliu atu he Uooti Fakafaito’o (Medical Ward) hili ia ‘a e mahino na’a ne fokoutua he niumonia.
‘I he Tusite 10 ‘o Sepitema, na’e tu’tu’uni ai ‘e he kau mataotao fakafaito’o ‘a e Falemahaki Vaiola ke fakafolau fakafaito’o ia ki Nu’usila.
“‘Oku ou tautapa atu ki he kakai ‘o e fonua ke mou manatua ange ‘a e ‘Eiki Palemia ‘i ho’omou houa lotu pea fakatauange ke tau toe talitali lelei ia ha’ane foki mai ki Tonga ‘i ha tu’unga mo’uilelei ‘i he kaha’u vave mai,” ko e kole ia mei he ‘Eiki Palēmia Le’ole’o ‘o Tonga, Hon. Semisi Kioa Lafu Sika.
Na’e toe tuku mai foki 'i he ongoongo ko'eni na'e sivi fakafaito’o ‘a e ‘Palēmia he konga kimu’a ‘o e ta’u ni ‘o fakapapau’i ‘oku uesia hono ‘ate pea na’e ola lelei ‘a e ngaue fakafaito’o na’e fakahoko ki ai ‘i he Falemahaki Mercy ‘i ‘Aokalani.
Ko e fehu'i 'oku tuku kiai 'a e tokanga 'a e tokolahi 'i he momeniti ko'eni 'o kau ai mo e ongoongo ni pe ko hono fakafolau 'o e Palēmia 'oku makatu'unga nai 'i he'ene niumonia pe 'oku toe palopalema ki hono 'ate 'a ia 'oku 'uhinga ai 'a e tu'utu'uni ko'eni 'a e kau mataotao.
'Oku fu'u mahu'inga 'aupito ke fakamahino 'a e tu'unga ko'eni 'oku 'i ai 'a e Palēmia he 'oku totonu pe hono 'ave fakafaito'o ia 'o e Palēmia ka 'oku 'ikai fu'u mahino 'a e ongoongo 'oku tuku mai.
