Kamata ‘a e Polokalama Langa Afā Saikolone Gita ‘i Va’epopua Featured
Minisita Polisi Mateni Tapueluelu mo e Minisita Pa'anga Pohiva Tui'onetoa
30 ‘Aokosi, 2019. Na’e faka’ilonga’i ‘i he ho’atā ‘o e ‘aho ni ‘e he ‘Eiki Minisitā Pa’angá Hon Pōhiva Tu’i’onetoa ‘a e kamata ‘a e Polokalama Langa Afā Saikolone Gita ‘i Va’epopua, Tongatapu ‘aki ha polokalama tanupou.
‘I he fakamatala ‘a e Pule Ngāue ki he Potungāue Ngaahi Ngāue Lalahí Ringo Fa’oliu ko e ngaahi fale nofo’anga fakakātoa ‘e 8,247 na’e maumau ‘i he Saikolone Gita ‘a ia na’e ‘i ai ‘a e ngaahi fale ai ‘e 561 na’e holoki faka’aufuli ‘e he saikoloné.
“Na’e fakakalakalasi ‘e he Pule’angá pea mo e Kōmiti Ngāué ‘a e ngaahi maumau ko ‘ení ki ha konga lalahi ‘e tolu. Makehe pea mei he tufa ‘o e ngaahi tapoleni pea mo e ngaahi koloa ke fakaai ‘a e fiema’u ‘a e ni’ihi na’e uesia ‘i he fonuá koe’uhi ko e matangi ko ení.”
“Na’e ai ‘a e taimi na’e fakakaukau ‘a e Pule’angá neongo e si’isi’i e iví, ke tufotufa ha ki’i sēniti ke tokoni ki he kalasi kehekehe ko eni ‘o e kulupu ‘e tolu na’a ku lave ki aí.”
Na’a ne fakahā foki na’e ma’u ‘e he Kōmiti Ngāué ‘a e ngaahi līpooti mei he hoa ngāue ‘o e pule’angá ‘o kau ki ai ‘a e Kautaha MORDI Tonga, Caritas Tonga pea mo e Siasi ‘o Sīsū Kalaisi ‘o e Kau Mā’oni’oni Ngaahi ‘Aho Kimui ni (LDS) felāve’i pea mo e ngaahi tokoni ne nau fakahoko ki he ngaahi fale nofo’anga ne uesia ‘i he matangí.
Ko e Kautaha MORDI Tonga na’a nau fakahoko ‘a e ngāue ke monomono ‘a e ngaahi fale ‘e 679 ‘i Tongatapu pea mo e fale ‘e 233 ‘i ‘Eua. Na’a nau toe langa foki mo e ngaahi fale fakataimi ‘e 28 ‘a ia ko e fale ‘e 18 ‘i Tongatapu pea 10 ‘i ‘Eua.
Ko e Caritas Tonga na’a nau fakahoko e ngāue ke monomono ‘a e ngaahi fale ‘e 315 pea ko e LDS leva na’a nau langa ‘a e ngaahi fale fakataimi ‘e 177 ma’ae kau mēmipa honau siasí na’e uesia honau fale nofo’angá ‘e he afaá.
Fakatatau ki he ola ‘o e savea fakamuimui tahá, ko e ngaahi fale ‘e 171 mei he ngaahi fale fakakātoa ‘e 561 na’e holoki faka’aufuli ‘e Saikolone Gita ‘oku te’eki ke fakahoko ha ngāue ke langa. Mei he ngaahi fale nofo’anga ‘e 171 ko iá kuo ‘osi fakapapau’i ai ‘a e ngaahi ‘api ‘e 27 ‘a ia ‘oku ‘osi fakamahino’i ko honau konga kelekele tonu ‘e fakahoko ai ‘a e langá.
Na’e ‘i he polokalama ni ‘a e ‘Eiki Minisitā Ngoué, Me’atokoní mo e Vaotātá Hon Losaline Ma’asi, ‘Eiki Minisitā Polisí, Tāmate Afí mo e Me’a fakafokifá mo e Minisitā ki he Potungāue Tānaki Pa’angá pea mo e Kasitomu Māteni Tapueluelu, Pule Ngāue ‘a e Potungāue MEIDECC Paula Ma’u, Pule Ngāue ‘a e Kautaha ‘Uhila ‘a Tongá Setitaia Chen, Pule Ngāue ‘a e Potungāue Sitetisitiká Toketā Viliami Fifita mo e kau fakaafe kehe pē.
- MEIDECC
