Tö Folofola Huufi 'e He'ene ‘Afió Tupou VI Faka’ali’ali Ngoue Vahe Fonua Ha’apai 2019 ^Featured

Tapu mo e ‘Otua Mafimafí ko hono kolosí na’e tā fakamisiteli ‘i he vahe fonua ni

Tapu mo e Hou’eiki ‘o e fonuá

Tapu mo e Kau Minisitā ‘o e Kapinetí mo e Kōvana Ha’apaí

Tapu mo e Kau Taki Lotú

Tapu mo e Kau Tauhi Fonua mo Ha’a Mātāpule, kae’umā e tangata mo e fefine’i fonua Ha’apai ‘oku tau lōnuku he Mala’e Lea ‘a e Tohí ke faka’ali’ali ‘a e ola ‘o e ngāue ‘a e ‘Otu Ha’apaí ki he ta’u ní.

Ko e kaveinga To’u Kai Mo Hono Lohú ‘oku fekau’aki mālie mo e feliuliuaki ‘a e ‘eá ‘oku ne uesia kitautolu he ‘aho ni. Na’e hoko ia he katoanga’i hoku ‘ahó pea tupu mei ai ‘a e pau ke liliu ‘a e polokalamá ‘o fakatatau ki natula. Ko e fiema’u ki he ngoue ‘o e ‘aho ni ke toe lahi ange ‘a e pulopula kehekehe ki he fiema’u fakalotofonuá. ‘Oku tau lolotonga fe’ao mo e ngaahi faingata’a fakaenatula ka ‘i he taimi tatau pē ‘oku ‘i ai ‘a e ngaahi faingamālie ‘oku ‘omai ‘e natula hāngē ko e lahi ange ‘a e fua fakakomesialé.

Ko e feliuliuaki ‘o natulá ‘oku fehangahangai ia mo māmani kātoa, ‘oku ‘ikai ko Tonga pē ka ‘i he taimi tatau ‘oku tau vakai ki he ngaahi faingamālie ke tau ala ngāue’aki ki he lelei fakafo’ituituí, fakafāmili, fakakolo, fakavahe mo e vahe fonuá.

‘Oku ‘i ai ‘a e ngaahi faingamālie ‘i he kolo fakatautehina ‘a Ha’apai mo e kolo ko ia ‘i Siaina ko Dongguan. ‘Oku lava ke fakafou mai ‘i he fetu’utaki vāofi ko eni ‘a e ngaahi tokoní hāngē ko e vaka toutai, ko e palau, pea pēhē ki he’enau fie fakahoko ‘a e tokoni kehekehe ki he ngaahi ngāue ‘i Tonga ni kae tautefito pē ki Ha’apai.

‘I he vā fakatautehina ko eni mo Dongguan ‘oku ‘i ai ‘a e faingamālie kenau fakahoko ha fekumi makehe ki he toutaí pea ke tokoni ki hono fakatupulekina ‘a e ma’u’anga mo’ui mei ‘ōsení. Ko e fakatātā ki aí, lahi ‘aupito ‘a e ngaahi ‘ulu’ulu ‘o e vahe fonua ni pea pēhē ki he ola ‘o e toutai kehekehé. Ka ‘oku fiema’u foki ketau vakai’i ‘a e ngaahi faingamālie ke toe hiki ai ‘a e mahu’inga ‘o ‘etau toutaí.

Kapau ‘e ‘ave ‘etau tokangá ki he toutai’i mo’ui ‘a e me’atokoni mei tahí pea ‘e lelei ange mo ma’olunga ange hono mahu’ingá ‘i he toutai ‘oku tuku ‘aisí. Ko e fakatātā ki aí ko e ika ‘oku kei mo’uí ‘e fakatau atu ia ‘i he mahu’inga ‘oku mā’olunga ange ‘i he ngaahi fale kaí pea pēhē ki he ngaahi hōtele ‘i Tonga ni.

Ko ia, ko e lava pē ke fakahoko ‘a e founga ko ení ‘i he māketi fakalotofonuá pea ‘e lava leva ke hoko atu ‘a e toutai mo’ui ‘o e fua mei ‘ōsení ke uta ki muli pea ko hono ola fakapa’angá ‘e liunga lahi ange ia ‘i he fakatau fakalotofonuá.

‘E a’u pē ki ha taimi ‘e ‘ikai ke fiema’u ai ketau hiki ‘o nofo ‘i ha ngaahi fonua muli koe’uhí ‘e lava pē ketau ngāue pea ma’u pē e pa’anga lelei ‘i he tu’unga mo’ui ‘oku toe ma’olunga angé ‘i he nofo pē ‘i Ha’apai ni.

Ko e Vahe Fonua Tongatapú foki ‘oku lahi taha ai ‘ene fakahoko ‘a e tō mo e uta fakakomesiale ‘o e niú pea toki hoko leva ki ai ‘a Foa. ‘Oku tatau pē eni mo hono tō ‘o e hiapō. Fēfē leva kapau tetau tuku e konga lahi ‘o ‘etau tokangá ki he fua ‘oku lava ketau ma’u ai ‘a e ola ‘oku leleí.

‘E lava pē fakahoko mo ha fakalelei ki he founga ‘o e ngoue ‘oku tau anga maheni ki aí ‘i hano tō fakapisinisi ‘o hāngē ko e kavá pe hiapó ‘i he kamata ‘o e tō ta’ú. Ka ‘ikai ko e tō pē ‘o e ‘ufí ‘a ia ke ne to’o ‘e ia ‘a e vaha’a taimí a’u pē ki he ta’u ‘e taha pea toki hoko ‘a e utu ta’ú. Ko Ha’apai foki ‘oku ‘iloa ‘i he ngāue ‘a e kau fefiné ki he koloa fakatongá mo e lālanga fihú.

Ko e konga mahu’inga ‘o ‘etau fakatokanga’i ‘a e feliuliuaki ‘o natulá ko ‘etau fakapotopoto’i ‘etau founga ngoué. ‘Oku lahi ‘a e fanga ki’i ngoue iiki ‘i Ha’apai ni, ko ia ‘oku lava ke fakahoko ‘i Ha’apai ni ‘a e founga ngoue makehe ‘a e fonua ko Taileni. Ko e tō fakataha pē ‘a e ‘akau fuá, ngoue ‘oku fohá mo e vesitapoló fakahoko mo e faama’i ‘o e monumanú kau ki ai ‘a e puaká, moá, pató pea pēhē ki he faama’i ‘o e iká. Ko e founga ma’u’anga mo’ui eni ‘a e kau ngoue ‘o Tailení ‘a ia ‘oku nau ma’u mei ai ‘a e fua mo e ola lelei mei he konga kelekele fe’unga mo e vaeua ‘eka.

‘Oku mahu’inga ketau fakahoko ‘a e ngoué mo e toutaí ‘i ha founga fakapotopoto pea ke lava ketau tō ‘a e fa’ahinga fua kehekehe ke lava ketau matu’uaki ‘a e feliuliuaki ‘a e ‘eá pea ketau manatu’i ma’u pē ‘oku ha’u fakataha pē ‘a e liliú mo ha ngaahi faingamālie.

Kou fakamalo atu mo e talamōnū ki he ngāue kotoa kuo fakahoko ke lava ‘a e faka’ali’ali ‘o e fua ‘o e ngoué, toutaí mo e ngaahi koloa fakafonuá pea pēhē ki he takimamatá mo e folau ‘eve’evá mo e ngaahi ngāue’anga ‘a e vahe fonua ni.

Kou ‘ofa atu kia kimoutolu hono kotoa.

NGATA’ANGA