Fakataha 'a e Palemia mo e Komiti Fakakolo ‘a e Kolo ko Dongguan 'i Siaina Featured
Mei he to’ohema: ‘Eiki Minista Pa’anga Dr. Pohiva Tu’i’onetoa, ‘Eiki Palemia Samuela ‘Akilisi Pohiva, Mr. Liang Weidong, ‘Amipasitoa ‘a Siaina ki Tonga His Excellency Mr. Wang Baodong.
27 Siulai, 2018. Na’e fakataha e Palemia, Hon Samuela ‘Akilisi Pohiva he pongipongi Pulelulu (25 Siulai) mo e Sekelitali ‘o e Komiti Fakakolo ‘o e Kolo ko Dongguan mo e Talekita ‘o e Komiti Tu’uma’u ‘o e Fale Alea ‘o e Kolo Mr. Liang Weidong ‘i he loki kapineti ‘i he St. George Government Building.
Ko e tokolahi ‘o e kakai ‘o e Kolo ko Dongguan ko e toko 8.34 miliona, pea ‘oku tu’u ia he Vahefonua ko Guangdong ‘i he fakaTonga ‘o Siaina. Na’e kau e kolo ni ‘i hono lele’i e ama ki hono fokotu’utu’u fo’ou ‘o e Pule’anga Siaina ‘o fakahoko ai e ngaahi fakalelei fakapolitikale
moe faka’ekonimika mo hono fakaava e ngaahi kau’aafonua ‘o e fonua ki tu’apule’anga.
Pea na’e liliu faka’aufuli ai ‘a Dongguan mei ha kolo na’e fakafalala ‘ene ma’u’angamo’ui ki he fua 'o e fonua ki ha kolo ngaohi’anga koloa. Kuo ‘osi fakapapau’i ko e telefoni ‘e taha mei he telefoni-to’oto’o ‘e nima kotoa pe ‘i mamani he ‘aho ni, na’e ngaohi ia ‘i Dongguan.
Na’e fokotu’u e va fetokoni’aki ‘o Tonga mo Dongguan he ta’u 2015 ‘o fou he tokoni mei he ‘Ofisi ‘o e ‘Amipasitoa Siaina ‘i Nuku’alofa. ‘I he ta’u e tolu kuohili na’e hanga ai ‘e Dongguan ‘o foaki mai ki Tonga ni e pa’anga tokoni mo e ngaahi koloa me’a’ofa ‘o fakataumu’a ki he ngaahi tapa kehekehe. Tau fakataataa ‘aki eni.
Ko’enau tokoni ki he ngaahi langa lalahi na’e fakapa’anga ‘e Dongguan hono ngaohi mo fakalelei e ngaahi hala ‘e 21 ‘oku tu’u ‘i loto Kolisi ko Tupou he 2016 pea mo e ngaahi hala fakapule’anga ki he ngaahi matanga fakatakimamata ‘o e fonua ‘e 13 ‘o kau ai e hala ki Liku’alofa ‘i ‘Ahau, pea mo e hala ki he Mapu ‘a Vaea ‘i Houma.
‘I Me 2016 na’e fakamo’oni ai ‘e he Tokoni Pule Kolo ‘o Dongguan pea mo e Kovana Ha’apai ‘o e ‘aho ko ia, ha aleapau “Fakahoko Va Fakakaume’a”. ‘I he taimi tatau na’e fakahoko mo e ngaahi ‘a’ahi fakafonua ‘a e kau taki ma’olunga,‘i he vaha’a ‘o Tonga mo Dongguan.
‘I he ‘ene me’a talitali na’e me’a e ‘Eiki Palemia ‘o pehe, “’Oku loto e Pule’anga Tonga ke fakahoko atu kiate koe ‘a ‘ene fakamalo lotohounga mo’oni ki he ngaahi tokoni ‘ofa kotoa pe kuo mou ‘omai ‘i he mala’e ‘o e Takimamata, Angafakafonua, Ako, Tokoni Fakamo’uilelei, Ngoue, pea moe Toutai foki. Ko Dongguan ko e kaume’a tu’uloa ‘o Tonga. Pea ‘oku hoko ho’o ‘a’ahi mai he ‘aho ni ko ha faingamalie ia ke toe fakaloloto ai ‘a hotau va fakakaume’a”.
‘I he me’a ‘a Mr. Liang Weidong, na’a ne pehe, “’Oku ou matu’aki fiefia ‘aupito he ‘eku fanongo ko e ongo kaume’a tu’uloa ‘a Tonga mo Dongguan. Neongo ko ‘eku fuofua ‘ahia eni ki homou fonua faka’ofo’ofa, ‘oku ou ofoofo ‘i he ‘ulungaanga fakatokilalo mo fietokoni ‘o e kakai
Tonga.
Ko Tonga ko e kaunga ngaue mahu’inga ‘aupito ia ki Siaina pea ‘oku fiema’u ke fakautuutu ange ‘etau fepotalanoa’aki mo fengaue’aki. ‘Oku mateutau ‘a Dongguan ke hokohoko lelei atu ‘ene ngaahi tokoni ke hiki’i hake e tu’unga mo’ui lelei mo tu’umalie ‘a e kakai ‘o Tonga”.
Na’e tau mai ‘a Mr. Liang Weidong mo ‘ene kau muimuifolau ‘e toko 8 he ‘aho 24 ‘o Siulai.
Hili ‘a e fakataha mo e ‘Eiki Palemia, na’e hoko atu e kau ‘a’ahi ki he polokalama makehe ke faka’ilongai’aki e kamata e polokalama sima’i ‘o e ongo kauhala he ngaahi hala lalahi ‘o loto Nuku’alofa ‘o fakapa’anga ‘e Dongguan.
Na'e foki atu e kau ‘a’ahi mei Dongguan 'aneafi Tu'apulelulu ‘aho 26 ‘o Siulai.
