Fakaola Tama Tu'i Kingi Tupou VI maama sola Falemahaki Tu’akifālelei ‘i Niuafo’ou Featured
Ko ‘Ene ‘Afio Kingi Tupou VI, ‘Eiki Kōvana Vava’u Nōpele Fakatulolo, ni’ihi ‘o e kau ngāue MEIDECC hili hono fakaola ‘o e maama sola fo’ou ma’ae Falemahaki Tu’akifālelei ‘i Niuafo’ou. Faitaa MEIDECC
23 Siulai, 2018. Na’e fakaola ‘e he Tama Tu’í Kingi Tupou VI, ‘a e maama sola fo’ou ma’a e Falemahaki Tu’akifālelei ‘i Niuafo’ou, ‘i he Tu’apulelulu ‘o e uike kuo ‘osí, lolotonga ‘a ‘ene ‘afio ‘i Niuafo’ou ki he Maa’imoa Faka’ali’ali Ngoue ‘a e vahefonuá.
Ko e maama sola ko ‘ení ko e ngaahi polokalama tokoni ia ‘a e Polōseki Ma’u’anga Ivi Fo’ou Ma’ae Ngaahi ‘Otu Motu (OIREP), ‘a ia ‘oku fakamalumalu ‘i he Va’a Mau’anga Iviˊ ‘i he Potungāue MEIDECC.
Fakatatau ki he fakamatala ‘a e ‘Ofisa Ma’olunga ‘i he Ma’u’anga Ivi, Kipola So’otanga ko e fuofua taimi ‘eni ke fokotu’u ai ‘a e maama sola ‘i he Falemahaki Tu’akifālelei.
“Ko e maama na’e fakalele’aki ‘a e Falemahaki Tu’akifālelei, ko e mīsini tīsolo (generator), pea na’e ngāue’aki pē ‘a e ‘uhila ‘i he houa ‘e ono he ‘aho, ka ko hono fokotu’u ko ‘ení ‘a e maama sola fo’oú ‘e malava leva ke ngāue’aki ‘a e maama ‘i he houa ‘e 24.”
Na’e pehē ‘e So’otanga ko e mālohi ‘o e sola ko ‘ení, ‘oku malava ke lele kotoa ai mo e ngaahi me’a faka’uhila ‘o hangē ko e ī, ‘aisi, maama mo e mīsini fufulu me’angāue.
‘I he fakamatala ‘a So’otanga, na’e lava lelei ai pē mo hono fetongi ‘o e ngaahi puha ‘uhila maama sola ‘i he ngaahi ‘api nofo’anga ‘e 122 ‘i Niuafo’ou.
“Ko e ngāue na’e ua, ko e ‘uluaki ko hono fokotu’u ‘o e maama sola ‘i he falemahakí, pea mo hono fetongi ‘o e ngaahi puha ‘uhila ‘i he ngaahi ‘api nofo’anga. Na’e lava lelei ia pea fokotu’u ai pē mo e ngaahi fo’i maama mo e fakafonu telefoni ‘i he ngaahi ‘api nofo’anga ko ‘ení.”
Ko e puha na’e fetongí ‘e lava ia ‘o ngāue’aki ‘i he ta’u ‘e 10 pea toki fetongi.
Ko hono tokangaekina ‘o e ngaahi maama sola ‘e fatongia’aki pē ia ‘a e Potungāue MEIDECC, pea ‘oku ‘i ai foki mo e Kōmiti Sola ‘a e Vahefonua Niuafo’oú ‘a ia ‘oku sea pē ai ‘a e Fakafofonga Pule’angá.
Ko e polōseki ko ‘ení ‘oku fakapa’anga ia ‘e he Pangikē Fakalakalaka ‘a ‘Esia (ADB), Pule’anga ‘Aositēliá (DFAT), Ngaahi Pule’anga Fakatahataha ‘a ‘Iulope (EU), GEF pea mo Denmark.
-MEIDECC
