Tali ‘e he Palemia ‘a e Fakafisi ‘a e Sekelitali Pule mo e Sekelitali ki he Kapineti ^Featured

Na’e fakahoko mai ‘e Toketa Langa’oi Tiueti ki he ‘Eiki Palemia ‘i he‘ene tohi fakafisi, kuo ui ‘a hono hoa, Toketa Siliveinusi Tiueti ‘e he Siasi Metotisi ‘o ‘Amelika, ke foki ange mei hono lakanga ko e faiako he Kolisi Tohitapu ko Sia’atoutai ‘o ngaue ko e Faifekau ‘i he taha ‘o e ngaahi Siasi ‘i San Francisco, California, ‘o kamata he ‘aho 1 ‘o Siulai 2018.

Na’a ne toe fakahoko mai ‘i he’ene tohi ‘oku ‘amanaki ke toe hoko atu ‘a hono hoa ‘i hono lakanga faka-faiako ‘i he ‘Univesiti ‘o Claremont pea mo e ‘Univesiti ‘o Berkeley, pea ‘oku ne palani ke fakahoko ha’ane ako faka-faifekau.

Na’e me’a e ‘Eiki Palemia ‘o pehe, “Na’a ma talanoa telefoni kimu’a atu mo Toketa Langa’oi Tiueti pea na’a ne fakahoko mai kiate au ‘a ‘ene fakakaukau ke ne fakafisi mei hono lakanga he ‘Ofisi Palemia, kae poupou mo tokoni ki hono husepaniti ‘i he ngaue ma’ae Siasi pea na’aku poupou ki he ‘ene faitu’utu’uni mo talamonu kiate ia.”