A'u ki he pa'anga $52.6 miliona tokoni ki he fakaakeake meia Gita Featured
12 Ma’asi, 2018. Ko e a’u mai eni ki he faka’osi’osi ‘o e fakahoko fatongia fakavavevave (emergency response) ‘a e ‘Ofisi Fakafonua ki he Pule’i ‘o e Me’a Fakafokifa (National Emergency Management Office – NEMO) pea mo hono ngaahi kupu fekau’aki, ‘oku fe’unga fakakātoa ‘a e pa’anga (cash) mo e ngaahi koloa (in-kind) kuo tokoni mai ‘aki ‘e he ngaahi Pule’anga Muli pea mo e ngaahi kautaha fakavaha’atpule’anga mo e $52.6 miliona.
Fakatatau ki he fakamatala mei he Potungāue Pa’angá mo e Palani Fakafonuá ‘i he’ene a’u mai ki he ‘aho ni, ko e pa’anga fakakātoa ‘e $23.6 miliona ‘oku ‘i he ‘akauni ‘a e Saikolone ko Gita (TC Gita Relief Account).
Pea kuo tali ai ‘e he Kapineti ‘a ‘Ene ‘Afio ke tuku mai ha $21.45 miliona mei he pa’anga ko eni, fakataha mo e $2 miliona mei he Pa’anga Fakafokifa ‘a e Pule’anga (Emergency Fund) ke tokoni ki hino fakahoko’aki ‘a e ngaahi ngaue fakavavevave ki he ngaahi maumau ‘a e saikolone.
Na’e peheé ‘e he ‘Ofisa Pule Ngāue ‘a e Potungāue MEIDECC Paula Pouvalu Ma’u, na’e to e tali pé ‘e he Kapineti hono vahevahe atu ‘a e pa’anga ko eni ki he ngaahi Clusters pē Komiti Si’i takitaha ke fakahoko’aki honau ngaahi fatongia.
“Ko e Shelter Cluster pe Komiti Si’i ki he Ngaahi Fale Nofo’angá, ‘oku tokanga’i ia ‘e he Potungāue ki he Ngaahi Ngāue Lalahí ‘i hono fakalelei’i mo monomono ‘a e ngaahi fale na’e maumau.
Fakatokanga’i ange ko e pa’anga ko ení ‘oku ngata pe ia ‘i he ngaahi tokoni fakavavevave ‘o a’u ki he fakaakeake pē ko e recovery, ‘oku te’eki ketau a’u tautolu ki he reconstruction pē ko hono langa fo’ou koia ‘o e ngaahi fale na’e holó”, ‘o fakatatau kia Paula.
‘I he’ene fakamatalá na’a né pehē ko e pa’anga ‘e $5.8 miliona kuo vahe’i ki he Shelter Cluster, $3.8 miliona ma’ae Education Cluster, $2.4 miliona ma’ae WASH Cluster, $1.3 million ma’ae Food & Security Cluster, $2 kilu ma’ae Communication Cluster pea $7.7 miliona ki he Essential Services ‘a ia ‘oku kau kiai ‘a e ngāue ki he ‘uhila..
“Ko e pa’anga ko eni kuo ‘ave ki he ngaahi clusters pe komiti si’í, ko nautolu leva ia tenau tokanga’i ‘enau patiseti pea pehē foki ki he’enau ngaahi ngāue ke fakahokó fakatatau ki he’enau ngaahi polokalama takitaha kuo fakahoko mai.”
Na’a ne toe fakahā foki ko e mahu’inga fakakātoa ‘o e in-kind pē ko e ngaahi koloa tokoni ne a’utaki mai ‘e he ngaahi vakapuná mo e vaka tahí mei he ngaahi fonua mulí mo e ngaahi kautaha fakavaha’apule’angá, ne fe’unga mo e pa’anga ‘e $17.4 miliona.
‘Oku ‘i ai mo e pa’anga tukupaá fakakātoa ki he $11.6 milion kuo’osi fakahoko mai ko e me’a’ofá ka ‘oku te’eki a’utaki mai hangé ko e pa’anga ‘e $10 miliona na’e me’a ‘aki ‘e he ‘Eiki Palemia Nu’usila lolotonga ‘ena folau mai ki Tonga ní.
‘Oku ‘oatu aipe ‘a e fakamālӧ loto hounga mo’oni mei he ‘Eiki Palemiá mo e Pule’angá ki he ngaahi tokoni kotoa pé ko eni kuo fakahoko mai.
NGATA’ANGA
Tuku atu mei he: Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina e Ngaahi Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.
