Poloseki ‘Apiako Maʻa Lahí 'a e Potungāue Ako mo e Ako Ngāué ^Featured

Ko e ‘Apiako Maʻa Lahí ko e poloseki faka-fonua ia ‘oku fakapaʻanga ‘e he Puleʻanga Siapaní, ‘o fengāueʻaki fakataha moe Potungāue Ako mo e Ako Ngāué, Kautaha Moʻui ‘a Māmaní pea moe Potungāue Moʻui.

Ko e fatongia mahuʻinga ‘o e Potungāue Ako mo e Ako Ngāué ko hono fakahoko ‘a e poloseki ko eni ‘i he ‘apiako ‘e 20 (fakataha pe ‘a e Pule’anga mo e Siasi), ngaahi lautohi si’i ‘e 15 moe ako kolisi ‘e 5.

Ko e taumuʻa ‘o e polosekí, ko hono fakaivia mo fakaloto lahiʻi ‘a e fānau akó ke liliu ‘a ‘enau tūkunga fakakaukau fekauʻaki mo e moʻuí, lolotonga ‘oku nau kei taʻu iikí, pea ke hokohoko atu ki he kahaʻu ‘o ‘enau moʻuí.

‘I he ‘Apiako Maʻa Lahí, ‘oku ‘i ai ‘a e konga lalahi ‘e tolu ‘oku fakatefito ki ai ‘a e tokangá: Maʻu meʻatokoni mo e fakamālohisino, Sino moʻui leleí mo e Vaí pea mo e Moʻui Maʻá mo e fanofanó.

Ko e ola ‘oku fiemaʻu mei he polosekí ni ke fakalakalaka ‘a e ‘ātakai, moʻui lelei ‘o e ‘apiakó pea mo malava ‘e he ‘apiakó ke fakatupulekina ‘a hono poupouʻi ‘a e toʻonga fakamoʻui lelei ‘a e fānau akó.

‘Oku ngāueʻaki ‘e he polosekí ni ha founga fakaloto ‘apiako ke vakaiʻi ‘aki mo muimuiʻi ‘a e ola ‘oku maʻú ‘i he ngaahi konga lalahi ko ‘eni ‘e tolú ‘o fakatatau ki he ngaahi levolo ko eni: Polonise, Siliva pea mo e Koula.

‘I he kamataʻanga ‘o e taʻú ni, naʻe kau atu ha kau fakafofonga mei he ngaahi ‘apiako ko ‘eni ‘e 20 ki ha ako ‘o fakatefito ki he Palani mo hono toe Fakalahi ‘o e ‘iló ‘o tefito ki he kau puleakó, kau fakafofonga mei he kautaha ‘a e mātuʻá moe kau faiakó pea mo kinautolu ‘oku fetuʻutaki hangatonu mo e polosekí ni ke nau malava ‘o palani lelei ‘a ‘enau ngaahi ngāue ke mahu’inga mālie ‘a e olá.

‘I he māhina ‘e ua kuo ‘osí, na’e foaki atu ki he ngaahi ‘Apiako Ma’a Lahi ha ngaahi naunau kehekehe kau ai ‘a e naunau sipoti, tangikē vai, naunau ki he falemālōlō (hūfanga he fakatapú), ngaahi kapa veve pea moe pulopula vesitapolo.

‘Oku fengāueʻaki vāofi ‘a e ngaahi ‘Apiako Ma’a Lahi moe ngaahi koló ke fakahoko ‘a ‘enau palani ngāue.

Ko e fakatātā mahino ‘o e polosekí ni ko e Lautohi Puleʻanga ‘a Tokomololó. Ko e Ako Māʻolunga ‘o Tongá kuo nau kamata ‘i hono fakapapauʻi ko e meʻatokoni moʻui lelei ‘oku fakatau atu ‘i he ngaahi fale fakatauʻanga meʻakai ‘i he ‘apiakó.

‘Oku mahuʻinga ‘aupito ki he Potungāue ‘a e vā fengāueʻaki ko eni pea moe Potungāue Moʻui, Kulupu Maʻa Lahí moe Kautaha ‘a e Mātuʻá moe Kau Faiakó pea mo kinautolu kotoa pe ‘oku felāveʻi mo e polosekí ni.

Kuo fakanaunau lelei ‘a e ngaahi ‘Apiako Ma’a Lahí pea ke pukepuke aipe ‘a e tuʻunga fakamoʻui lelei ‘a e ‘apiakó pea mo poupoua ‘a e moʻui lelei ʻa e fānau akó.