Fakamanatua fakamāmani lahi ‘aho e kau Faiako Featured
Palesiteni Siasi Tokaikolo Faifekau Dr. Liufau Vailea Saulala, Minisita Ako Penisimani Fifita, Kau Talekita mo e kau Faiako Malolo 'i he ngaahi Ako'anga kehekehe 'i he fonua. Faitaa: MEIDECC
8 ‘Okatopa, 2018. Na’e fakahoko ‘a e lotu fakafeta’i ki hono fakamanatua ‘a e ‘aho fakamāmāni lahi ‘o e kau faiakó, ‘i he holo Falemasiva ‘o Tailulu, ‘i he pongipongi Falaite ‘o e uike kuo ‘osí ‘aki ‘a e kaveinga “ Ko e Faingamālie ke Akó, ‘Oku totonu ke ma’u ha Faiako kuo teu’i lelei.”
Na’e tataki ‘a e ouau lotu fakafeta’i, ‘e he Siasi Tokaikolo ‘ia Kalaisi, ‘o me’a tonu ai ‘a e Minisitā ‘o e Ako, Hon. Penisimani Fifita pea mo e Palesiteni ‘o e Siasi Tokaikolo ‘ia Kalaisí Faifekau Dr. Liufau Vailea Saulala.
‘I he me’a ‘a e fakaafe fakalangilangi ‘o e ‘ahó Faifekau Dr.Liufau Vailea Saulala, na’a´ ne pehē ko ‘ofa na’e lea ki ai ‘a e folofolaˊ ‘a e ‘Otua. Ko e me’a kotoa pē ‘oku´te fakahoko he ‘ofa pea loto ke fakafelāve’i ki he ngaahi me’a ‘okuˊ ne fakatupu pea puke ‘aki ‘a e ‘ofa e me’a kotoa pē.
Na’a´ne fakamamafa’i ki he kau faiako ke nau lea faka’apa’apa,’ofa mo’oni, mo loto ma’ulalo.
“Ko e Faiakó ko e tokotaha ke loto to’a ,’ikai sio kita, loto foaki ‘ene mo’ui ki ha taha kehe. ‘Oku malava pē ‘e he ngaahi kalusefai mo e fakahoko feilaulau ha faiako ‘o liliu ha ki’i kalasi ‘o nau tu’u kimu’a he ngaahi mala’e kehekehe ‘o e ako.”
Na’e pehē ‘e Faifekau Dr.Saulala , Ko e ‘ofa he ‘Otua ‘e fakafou mai ia he kau Faiako, pea mo e silapa, pea e toki kakato ‘enau ‘ilo, ‘o tau ui ko e ako lelei pea tolonga ‘etau fononga ‘o tau ma’u ha Tonga tauatāina mo ha Tonga fonu fiefia .
‘I he kaveinga mo e fekau (message) fakamāmani lahi kuo tuku mai mei he UNESCO, UNICEF, mo e UNDP ma’ae kau Faiakó, ‘a ia na’e lau ‘e he fakafofonga mei he Potungāue Ako ‘oku ‘amanaki kene ma’u vāhenga mālōlo ‘i he ta’u fo’ou , Pungatoa Mā, ‘oku pehē ‘oku faka’ilonga’i fakamāmani lahi ‘a e tokoni mahu’inga ‘a e Faiako kotoa pē ki hono hakeaki’i ‘o e mo’ui ‘o e longa’i fānau, mo e to’utupu kotoa pē.
“’Oku tau tō ‘a e tukupā ke fakalotolahi’i ‘a e Faiako ‘oku nau ma’u ‘a e taukei. Ke nau ma’u ‘a e taukei fakafaiako ki hono ngāue’i ‘o e tukupā kuo fokotu’u ke fakapapau’i ‘oku ma’u faingamālie ‘a e fānau mo e to’utupu, ki he ako ‘oku lelei ange.”
‘I he hoko atu ‘a e fekau ko ‘ení ‘oku pehē mai ‘oku fiema’u ke fakapapau’i ko e fānau kotoa pē ‘oku fiema’u ke ako pea mo ngaue’i honau tu’ungá. Kuo pau ke teu’i lelei foki mo e kau Faiako pea ma’u mo e ngaahi poupou ‘e lava ai ke nau feau ‘a e fiema’u kotoa ‘a e kau Faiakó, ‘o kau ai mo e fānau ‘oku li’ekina.
‘Oku fakamanatua foki ‘a e ‘aho fakamāmalahi ko ‘ení ‘i he ta’u kotoa pē, ‘o tataki ‘e he ngaahi Siasí ‘a e lotu fakafeta’i. Ko e lotu fakafeta’i ‘o e ta’u kuo ‘osí na’e tataki ia ‘e he Siasi Faka-‘Ingilani.
-MEIDECC
