Kamata sivi hu ki he ngaahi kolisi Featured
4 'Okatopa, 2017. Na'e kamata 'aneafi Tusite 3 'o 'Okatopa 'a e sivi hu ki he ngaahi kolisi 'i he 'Otu Tonga pea 'oku fe’unga mo e fānau ako kalasi ono ‘e toko 3,022 ‘oku nau sivi ‘i he Sivi Hū Fakapule’anga ki he ngaahi kolisí ‘i he ta’ú ni.
Ko e toko 1,376 ai ko e fānau fefine, pea ko e toko 1,646 ai ko e fānau tangata.
Fakatatau ki he ngaahi fakamatala kuo tuku mai mei he Va’a Sivi ‘a e Potungāue Akó ko e ngaahi fai’anga sivi kotoa ‘e 104 ‘oku fakahoko ai ‘a e sivi ‘a e fānau kalasi onó. ‘I Tongatapú ‘oku ‘i ai ‘a e fai’anga sivi ‘e 16 ‘i he Vahe Hihifó, fai’anga sivi ‘e 12 ‘i he Vahelotó pea 24 leva ‘i he Vahe Hahaké.
‘I he ngaahi ‘otu motú, ko e fai’anga sivi ‘e 28 ‘i he Vahefonua Vava’ú, 18 ‘i Ha’apai, tolu ‘i ‘Eua, taha ‘i Niuafo’ou pea mo e fai’anga sivi ‘e ua ‘i Niuatoputapu.
Ko e ngaahi lēsoni ‘e fā ‘oku fakatefito ai ‘a e siví, ‘a ia ko e lēsoni Lea Faka-pilitāniá na’e sivi’i ia ‘aneuhu pea mo e lēsoni Saienisí ‘i he efiafí ni.
‘E faka’osi’aki leva ‘a e lēsoni Fiká ‘i he pongipongi ‘apongipongí pea mo e lēsoni Tongá ‘i he efiafí.
‘I he ta’u kuo ‘osí na’e fe’unga mo e fānau ako kalasi 6 ‘e toko 2,946 na’a nau kau atu ki he Sivi Hū ki he Ngaahi kolisí.
