Hifoaki Fua Tohi he Teoli Tā-Vā ‘o e ‘Iai Featured
21 Siulai, 2017. ‘Oku teuaki ke hifoaki ‘a e fua tohi he Teolia ‘a e Tā-Vā ‘o e ‘Iai (Tā-Vā [Time-Space] Theory of Reality) he ‘aho Falaite 28 ‘o Siulai 2017 he tā-vā 6.30 ki he 9.30 efiafi he Mangere Arts Centre ‘i Mangere ‘i ‘Aokalani ‘i Nu‘usila.
Neongo kuo lahi ‘a e ngaahi ngāue fo‘ou fakatautaha ‘a e kau sikola ‘o e Teolia ‘a e Tā-Vā ‘o e ‘Iai kuo paaki ko e vahe he ngaahi tohi mo e ‘atikolo he ngaahi sēnolo ka ko e toki fuofua pulusi ‘eni ha ngaue fakatokolahi mo fakakātoi makehe mo fo‘ou ko e tohi he teolia ni.
Na‘e fua fofoa‘i ‘a e teolia ni ‘e Hūfanga Palōfesa Dr ‘Ōkusitino Māhina mo Maui-Tāvā-He-Ako Palōfesa Dr Tēvita O. Ka‘ili, mo to e kau mai ‘a e kau ‘akatēmika tokolahi, ‘o hangē ko Matanigifale Dr Nuhisifa Seve-Williams, Dr Telēsia Kalāvite, Fepulea‘i Dr Micah Van der Ryn, Tavakefai‘ana Sēmisi Fetokai Potauaine mo Kolokesa Uafā Māhina-Tuai.
‘Oku kau ha kau sikola ‘e toko 12 he ngaahi mala‘e kehekehe mei he ngaahi ‘univēsiti kehekehe he ngaahi fonua kehekehe na‘a nau fa‘u ‘a e ngaahi vahe ‘e 14 he ngaahi kaveinga kehekehe, ‘a ia na‘e kaungā ‘etita ‘e Maui-Tāvā-He-Ako Palōfesa Dr Ka‘ili, Hūfanga Palōfesa Dr Māhina mo Kula-He-Fonua Palōfesa Dr Ping-Ann Addo.
‘Oku ‘i ai ‘a e konga he polokalama hifoaki tohi ko e sēsoni talanoa ‘a e toko 5 ‘o e kau tufunga fa‘utohi ‘i Nu‘usila, ‘o tefito he Teolia ‘a e Tā-Vā ‘a ‘o e ‘Iai, ‘a ia ‘e faka‘atā mo fakafaingamālie ha tā-vā ki he matanga ke nau to e tānaki, fehu‘i mo fakaanga.
‘E hifoaki ‘a e tohi ‘e Dr Sione Lavenita Vaka na‘e kau ‘a e Teolia ‘a e Tā-Vā ‘o e ‘Iai he ngaahi teolia na‘a ne ngāue‘aki hono tufunga ‘ene fisisi PhD he ako neesi he ‘Univēsiti ‘o Mesī ‘i Nu‘usila. ‘Oku ‘i ai ‘a e ngaahi fisisi BA (Hons), MA mo e PhD ‘oku ofi he 20 na‘a nau ngāue‘aki ‘a e teolia ni pea ‘oku ‘alu māmālie pē ke to e lahi ange.
