Foki mai ‘a e Ifi Kolisi Tonga mo e Pa’anga 1.2 Miliona ‘Amelika Featured
Fanau ifi Kolisi Tonga teu ke mavahe mai 'a e folau mei 'Amelika
31 Sanuali, 2016. Kuo tu’uta lelei mai foki ‘a e ifi ‘a e Kolisi Tonga pehe ki he kau folau mei ‘Amelika ‘i he ‘aho Tokonaki 28 Sanuali hili ia ha’anau folau uike 7 ki ‘Amelika.
Ko e folau ko’eni na’e tataki atu ia ‘e he Puleako Tevita Kalafitoni Latu pehe ki he Tokoni Palesiteni ‘o e Kolisi Tutuku Taimifolau (Poutele Tu’ihalamaka) pehe ki he kau Kolisi Tutuku, Kau Ifi, mo e Kau Faiako.
‘I he fakamatala mei he Puleako ko e folau ‘eni na’e ‘ofeina ‘aupito kae tautautefito ki he Kolisi Tutuku, Kolisi Tutuku Kolisi ko Tupou, Ngaahi Kolisi Tutuku Kehe , Ngaahi Siasi mo e kainga Tonga ‘oku fakapaea ‘i he fonua hau ni.
Ko e pa’anga lahi foki ‘eni he kapau ‘e liliu ki he pa’anga Tonga he ‘e ‘ikai toe si’i ia he pa’anga ‘e 2 miliona ‘a ia ‘oku kau ‘eni he feinga pa’anga lahi mo’oni kuo fakahoko.
Ko e taumu’a foki ‘o e feinga pa’anga ko’eni ki he langa holo ‘a e Kolisi ‘a ia na’e vela he ngaahi ta’u si’i kuo maliu atu.
Na’e fakahoko foki ‘a e koniseti takai ‘a e Kolisi Tonga ‘i Tongatapu ni ‘i he faka’osinga ‘o e ta’u 2016 ‘a ia na’e ma’u ai ‘a e pa’anga ‘e 8 kilu tupu kimu’a pea nau toki folau atu ki ‘Amelika ‘i he mahina ko Tisema.
