Lo'au, Tufunga Fonua mo e Tala 'a e Ouau 'o e Kava ^Featured

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava’u Academy for Critical Inquiry and Applied Research [VACIAR] &
Tonga International Academy [TIA]

Laulau ‘o e Kava:

Kava ko e kilia mei Fā’imata
Ko e tama ‘a Fevanga mo Fefafa
Fahifahi pea mama
Ha tāno’a mono’anga
Ha pulu hono tata
Ha pelu hono tau’anga
Ha ‘eiki ke olovaha
Ha mu’a ke ‘apa’apa
Ha tou’a ke taukava
Ha hoko ke angaikava
Ma’opo ‘a e ‘alofi tupu’a
Fai’anga ‘o e fakataumafa

Ta’anga laulau ‘o e kava ko e fatu ‘a Lo’au

Na’a ku talanoa he ‘atikolo 11 hono tufunga ‘a e tala ‘o e kava ‘e he tufungafonua ‘iloa ko Lo’au he tala tupu’a ‘o Tonga – ‘a ia ‘oku fetukuaki holo ai ‘a e kona mo e melie – ‘o hangē ko hono tomu’a u’usi ‘e he kumā ‘a e ‘akau ko e kava ‘oku kona he va’e ‘o e fa’itoka ‘o Kava mo tomui u’usi ‘a e ‘akau ko e tō ‘oku melie he ‘ulu – ka e ‘uma’ā hono fua inu ‘a e kava kona ka e toki kai ‘a e tō melie – ‘a ia ‘oku ‘uhinga ki he ngāue faka’ofo’ofa, ‘aonga mo tolonga kotoa pē – ‘o tomu’a inu ‘a e kona ka e toki kai ‘a e melie – ka teu hoko atu heni, he ‘atikolo 12, ki hono to e tufunga ‘e Lo’au ‘a e tala ‘o e ouau ‘o e kava.

Na’e faifai ‘a e tupu ‘a e ongo fu’u ‘akau, ‘a ia ko e kava mo e tō he fa’itoka hona ‘ofefine, ‘a Kava, ‘o na fakatou lalahi fe’unga – pea fakakaukau ai ‘a e ongo mātu’a, ‘a Fevanga mo Fefafa, ke na ta’aki – ‘o na folau atu mo ia mei ‘Eueiki ke ‘ave ki he Tu’i Tonga, ko Momo, ki Heketā. Na’e talitali hona fonongá ‘e Lo’au, ‘a ia na’a ne tufunga ai ‘a e tala ‘o e ouau ‘a e kava, ‘o hangē ko ia ‘oku ‘asi atu hono laulau ‘i lalo. Na’e lava hono tufunga ‘e Lo’au ‘a e ouau ‘o e kava – ‘o hangē ko ‘ene tufunga ‘a e tala ‘o e kava – pea na’e toki tuku leva ki he kau faiva tauhifonua ke nau hoko atu hono pukepuke mo tauhi.

Kava ko e kilia mei Fā’imata
Ko e tama ‘a Fevanga mo Fefafa
Fahifahi pea mama
Ha tāno’a mono’anga
Ha pulu hono tata
Ha pelu hono tau’anga
Ha ‘eiki ke olovaha
Ha mu’a ke ‘apa’apa
Ha tou’a ke taukava
Ha hoko ke angaikava
Ma’opo ‘a e ‘alofi tupu’a
Fai’anga ‘o e fakataumafa

‘Oku taku he tala na’e folau mai ‘etau fanga kui mei Pulotu he vaka ko e kalia pea he’enau tu’uta ‘i Tonga na’a nau fulihi fo’ohifo leva honau vaka [fa’u ‘e he tufunga fo’uvaka] – ‘o nau hanga ‘o hili he ngaahi fo’i pou [mo lalava ‘e he tufunga lalava] – ‘a ia na’e hoko honau vaka ko e fale [langa ‘e he tufunga langafale] – ‘o toki fai ‘i loto honau kava ke ma’alali ‘enau folau hao. Na’e tufunga ‘a e kava he fetaulaki’anga ‘o e vaka [ko e fale fakafo’ohake] mo e fale [ko e vaka fakafo’ohifo] – ‘o ui’aki ‘a e kava na’e fai ‘i loto he fale ‘i ‘uta ‘a e ngaahi lea ‘o e vaka ‘i tu’a he tahi – ‘o kau ai ‘a e olovaha ki he taumu’a, ‘alofi ki he ‘a’alo mo e tou’a ki he taula.

‘Oku mahu’inga ke tokanga’i ko e fua talamu’a/mape/siate ‘eni ‘a e oauau ‘o e kava – ‘a ia na’e mu’aki tufunga ‘e Lo’au – ‘o toki tuku ki he kau tauhifonua ko honau faiva ke nau hokohoko atu hono tokanga’i mo tauhi – ‘o nau fai ‘a e ngaahi liliu he funga honau fatongia ko e kau faiva tauhifonua – ‘a ia na’e kau ai hono fetongi ‘a e pulu tatakava ‘e he fau taukava, pelu tau’anga ‘e he ipu inukava, kava mata ‘e he kava momoa mo e mama ngutu ‘a e kava ‘e he tuki maka ka ‘oku ke i tolonga mai pē ‘a e tāno’a – ‘a ia na’e fua mama ngutu ‘a e kava mata ‘o toki fakaholo ki ai – ‘o liliu ki he tuki maka ‘a e kava momoa.

‘Oku mahino na’e tokanga’i ‘e he kau faiva tauhifonua na’e fonu te’epulu ‘a e kava hono tata’aki ‘a e pulu ‘o e niu, ‘o ma’u ai ‘a e fakakaukau ke fulihi ‘o ngāue’aki ‘a e fau hono tatau’aki ‘a e kava – ‘a ia ‘oku ‘ikai ngata pē he’ene ma’a ka e to e faingofua – ‘o hangē ko e lahi ange ‘a e hafu ki tu’a ‘a e kava hono tatau ki he pelu [‘a ia ko e lau’ifusi na’e ā mo tapelupleu] – ‘o fetongi’aki ‘a e ipu nge’esiniu – ‘a ia ‘oku to e malu, faingofua mo tolonga ange. ‘Oku tatau mo hono liliu mei he mama’aki ‘a e ngutu ‘o e kava ki hono tuki’aki ‘a e maka, ‘o ‘ikai ngata pē he’ene vave mo faingofua ka to e ongo mālie foki.

‘Oku kau he ngaahi liliu ko ‘eni hono to e fetongi ‘a e fau taukava ‘a e tangai palukava – ‘a ia na’e fua fetongi ‘a e pulu tatakava ‘e he fau taukava, tuki maka ‘a e kava hono tuki/momosi misini – ‘a ia na’e mu’a fetongi ‘a e mama ngutu ‘o e kava hono tuki maka, maka tukikava ‘e he misini tukikava/momosikava mo e kava tolu ‘a e olovaha he’ene fuakava. ‘Oku ke i tolonga mai ‘a e fo’i angi ‘a e taukava – ‘a ia ‘oku pehē: “Taumafa ē na’e holo” – ‘o tali mai ‘e ‘e he matāpule: “Kuo holo” mo e hā fua – ‘a ia ‘oku ‘uhinga ki he mama ‘a e kava ‘o “holo” ki he tāno’a – ‘o toki fetongi ‘e he fo’i angi ko e: “Taumafa ē na’e tuki.”

‘Oku ma’u heni ‘a e fakakaukau mo fakangāue mālie fau mo ‘aonga atu – ‘a ia ko hono fai ‘a e liliu kotoa pē – ‘o tatau pē ‘a e kava, ako, lotu, temokalati, kolo, pule’anga mo e fonua – ‘a ia ‘oku pau leva ke ta u foki ma’u pē ki he talamu’a/mape/siate ka e ofiofi tonu, faka’ofo’ofa mo ‘aonga ‘a e me’a ‘oku ta u liliu mei ai mo e me’a ‘oku ta u liliu ki ai – ‘o tatau tofu pē mo ha vaka ‘oku fakatou taumulitonu mo taumu’atonu ‘ene folau ‘i tahi – ‘a ia ‘oku ‘uhinga ia ‘oku ‘i ai ‘etau ‘ilo fakatou’osi ‘a e taulanga ‘oku ta u folau mei ai mo e taulanga ‘oku ta u folau ki ai – ‘o iku leva ko e vaka hao, folau hao mo e folau mo’ui.

‘O ka ‘ikai ke ta u foki ma’u pē ki he talamu’a/mape/siate hono fai ‘a e liliu kotoa pē ‘e lahilahi hala, palakū mo ta’e’aonga ‘a e me’a ‘oku ta u liliu mei ai ki he me’a ‘oku ta u liliu mei ai – ‘o hangē pē ko e kava, ako, lotu, temokalati, kolo, pule’anga mo e fonua – ‘a ia tatau tofu pē mo ha vaka ‘oku fakatou taumulivale mo taumu’avale ‘ene folau ‘i tahi – ‘o ‘uhinga ia ‘oku ta u hala he ‘ilo fakatou’osi ‘a e taulanga ‘oku ta u folau mei ai mo e taulanga ‘oku taa u folau ki ai – ‘a ia ‘oku ola ko e vaka hē, folau hē mo e folau mate. Ne’ine’i ui ‘a e kakai ‘oku nau mohu ‘ilo mo fonu poto he talamu’a/mape/siate ko e “fanga puaka na’e fuanifo.”

Tau toki hoko atu ...