'I Tonga ni 'Atisi Tonga ko e fekumi ki he Kupesi Faka Tonga ^Featured

Ko Uili foki na'e toki kamata kene fakatokanga'i hono taleniti 'i he mala'e 'o e 'aati 'i he ta'u nai 'e 10 kuo maliu atu ka kimu'a ai na'a ne fakahoko 'a e ngaahi ngaue kehekehe 'o kau ai 'ene hoko koe tokotaha fai fakamalohisino fakapolofesinale pehe foki ki he fotofota faka polofesinale. Fakatatau ki he fakamatala 'a Uili, na'e kamata 'ene fakatokanga'i 'oku 'i ai hono taleniti 'i he mala'e ni 'i he lahi 'ene feohi mo Hufanga Palofesa Dr. 'Okusitino Mahina pehe ki he kau tangata kehe 'iloa 'i Tonga ni he mala'e 'o e 'Aaati hange ko Paula Potauaine mo Filipe Tohi.

Na'a ne fakatokanga'i mo manako ai 'i he kupesi 'iloa koia 'a Tonga ni koe Fata 'o Tu'i Tonga pea ne'a kamata leva kene muimui'i 'a hono fulifulihi 'o e kupesi 'iloa ko'eni mei he ngaahi tapa moe 'engikolo kehekehe 'o kau ai hono fakahopo ki loto mo tu'a pea ki hono anga 'i he'ene tu'u 'i he taimenisio 'e 3 (3 Dimentions) 'o a'u ai pe ki he taimenisio 'e 5 pe lahi ange. Na'e pehe 'e Uili 'oku makatu'unga 'ene ngaue faka 'aati 'i he'ene lalanga 'a e ngaahi ongo mo e ngaahi fe'unu'aki faka natula 'i he kupesi 'a ia 'oku ne ma'u ai 'a e ivi (energy) pea 'oku matangi leva ai 'ene fakakaukau mo fokotu'utu'u 'o e ngaahi fe'unu'aki ko'eni 'o hoko koe 'aati.

Na'e toki foki mai foki 'a Uili Lousi 'i he mahina ko Tisema 2014 mei Niu 'Ioke na'e fakahoko ai 'ene ngaahi faka'ali'ali pea 'oku 'amanaki kene mavahe atu ki Nu'usila 'i he mahina ka tu'u. 'Oku ha atu foki 'i lalo 'a e ngaahi 'ata 'o e ngaue 'a Uili Lousi.