Ko e ‘Ata ‘o e Kupesi ko e Manulua mo e Lā ‘o e Vaka ko e Kalia (2) ^Featured

Fai ‘e Palōfesa Hūfanga Dr ‘Ōkusitino Māhina
Professor of Art, Culture + Critical Anthropology
Moana University (MU) + Vava‘u Academy for Critical Inquiry + Applied Research (VACIAR)

- Matangi ka tonga pea tokelau
‘O falala ‘ihe Tu‘alikutapu

- Matangi ake matangi hifo
‘O fepakitu‘u ‘i hoku loto

(Mei he ongo maa‘imoa faiva ta‘anga hiva kakala ‘a Kuini Sālote)

- Tahi mei hē vai mei hē
Si‘i nofo ni ‘i lelenga pē

- Tahi pē vai?
Ke talia mai!

(Mei he ongo tufunga/faiva lea Tonga heliaki, paloveape pē fakatātā fo‘ou)

Na‘e kamata ‘eku tālave, he ‘atikolo 38, kihe felāve‘i vāofi fakatā-vā mo fakafuo-uho he vaha‘a ‘oe “angi/ngaue ‘ae matangi” (“wind in motion”) – ‘aia ‘oku fekau‘aki moe ako/saienisi ‘oe hailōtaināmika (aerodynamics) – moe “tafe/ngaue ‘ae tahi/vai” (“sea/water in motion”) – ‘o felāve‘i moe ako/saienisi ‘oe haitōtaināmika (hydrodynamics) – he‘ena fekau‘aki hangatonu he vaha‘a ‘ae ‘ata ‘oe kupesi koe manulua moe lā ‘oe vaka koe kalia – kae tuku mu‘a ke hoko atu ‘eku talanoa heni, he ‘atikolo 39, hono fakatotolo mo fakaloloto ha toe ngaahi tapa kehe ‘enau ngaahi fekau‘aki fihi mo mālie.

Na‘e ma‘u ‘ae 'ilo moe poto tupu‘a ‘ae ‘ata ‘oe kupesi koe manulua moe lā ‘oe vaka koe kalia mei he ako/saienisi ‘oe tufunga lalava moe tufunga fo‘uvaka – 'o hangē pē koe ma‘u ‘ae ‘ilo moe poto tu‘ufonua he tā-vā moe fuo-uho ‘oe sino moe ‘ato ‘oe fale mei he ako/saienisi ‘oe tufunga langafale. ‘Oku toe fekau‘aki ‘ae vaka moe "angi ‘ae matangi" moe "tafe ‘ae tahi/vai" – ‘o hangē pē koe toe fekau‘aki ‘ae fale moe "angi 'ae matangi” moe "tafe 'ae vai.” ‘E lava ke lau koe hailōtaināmika koe saienisi/‘enisinia ‘oe vai moe haitōtaināmika koe saienisi/‘ensinia ‘oe matangi.

'Oku fekau'aki lahi 'ae lā moe vaka moe "angi 'ae matangi” moe “tafe ‘ae tahi/vai” – 'o hangē koe felāve‘i lahi ‘ae kapakau moe manupuna moe “angi ‘ae matangi” moe “tafe ‘ae vai” – ‘o hangē koe fekau‘aki lahi ‘ae kapakau moe vakapuna moe “angi ‘ae matangi” moe “tafe ‘ae vai.” ‘Oku felāve‘i kotoa leva ‘ae lā ‘oe vaka(folau), kapakau ‘oe manupuna moe kapakau ‘oe vakapuna moe “angi ‘ae matangi” moe “tafe ‘ae vai” – ‘o hangē koe fekau‘aki kotoa ‘ae sino ‘oe vaka, sino ‘oe manupuna moe sino ‘oe vakapuna moe “angi ‘ae matangi” moe “tafe ‘ae tahi/vai” – ‘o nau ngaofe, fuopotopoto mo tapotopoto kotoa.

‘E lava ke lau koe lā koe kapakau ia ‘oe vaka(folau) mo lau ‘ae kapakau koe lā ia ‘oe manupuna moe vakapuna – ‘aia koe ngaahi “‘ata-ki-tu‘a” kotoa ia ‘oe kupesi koe manulua – pea taku koe kupesi manulua koe “‘ata-ki-loto” kotoa ia ‘ae lā ‘oe vaka(folau), kapakau ‘oe manupuna moe kapakau ‘oe vakapuna. ‘Oku ngali na‘e ui ‘ae vakapuna koe vaka ‘oku puna he vavā – ‘o hangē koe vaka(folau) koe vaka ‘oku folau he tahi/vai moe manupuna kihe manu ‘oku puna he ‘atā (‘ātea/langi‘ātea/lai‘atea). ‘Oku ui ‘ae vakapuna ‘i Ha‘amoa koe vakalele – ‘o mata ‘uhinga koe vaka ‘oku lele ‘i ‘uta (pea toki puna he vavā/‘atā).

‘E lava ke fokotu‘u na‘e ui ‘ae saienisi ‘oe “angi ‘ae matangi” moe “tafe ‘ae tahi/vai” koe hailōtaināmika moe haitōtaināmika he ako fakaUēsite koe “tala ‘oe matangi” moe “tala ‘oe tahi/tala ‘oe vai” he ako fakaTonga. ‘Oku ‘asi ‘eni he ngaahi lea mālie mo loloto fekau‘aki moe “angi ‘ae matangi” – ‘o hangē koe tala matangi, koloa e matangi, matangi lelei, matangi kovi, matangi mālie, matangi mālohi, matangi taka, matangi tō, matangi māfana, matangi mokomoko, matangi tokelau, matangi tonga moe matā matangi – ‘aia ‘oku nau felāve‘i moe tu‘unga ‘oe “mālohi-vaivai” moe “māfana-momoko” ‘ae matangi, (‘o kau ai hona anga koe “vave-tuai”).

‘Oku toe ‘asi ‘eni he ngaahi lea mohu mo fonu felāve‘i moe “tafe ‘ae tahi/vai” – ‘o hangē koe tahi hu‘a, tahi mamaha, tahi lahi, tahi si‘i, tahi lelei, tahi kovi, tahi liku, tahi toafa, tahi loloto, tahi peaua, tahi nonga moe matā tahi – moe “tala ‘oe peau” koe peau tā, peau ta‘ane, peau tangata, peau kula, peau tupukoso, peau lalahi, peau iki, peau mo‘ui, peau mate, peau fisihina moe mata peau/mata ‘au – moe “tala ‘oe ngalu” koe ngalu fānifo, ngalu fasi, ngalu pā, ngalu ta‘ane, ngalu tuku moe ngalu heke – ‘aia ‘oku nau fekau‘aki kotoa moe tūkunga‘oe “mālohi-vaivai” moe “māfana-momoko” ‘ae tahi, (‘o kau ai hona anga koe “vave-tuai”) .

Na‘e lahi ke fakatefito ‘ae ako kihe ‘ilo moe poto he “angi ‘ae matangi” moe “tafe ‘ae tahi/vai” he ha‘a tufunga fo‘uvaka, ha‘a tufunga langafale moe ha‘a faiva toutai – ‘aia na‘e vaheua kihe ha‘a faiva toutaivaka moe ha‘a faiva toutaiika. Na‘e kau ‘ae ha‘a faiva faifolau kihe ha‘a faiva toutaivaka – ‘aia na‘e kau ai ‘ae ha‘a faiva lovavaka moe ha‘a faiva ‘alovaka. ‘E lava ke lau koe ha‘a tufunga fo‘uvaka, ha‘a tufunga langafale, ha‘a faiva toutai (ha‘a faiva toutaivaka moe ha‘a faiva toutaiika), ha‘a faiva lovavaka moe ha‘a faiva ‘alovaka koe kau saienitisi/’enisinia ‘oe “tala ‘oe matangi” (hailōtaināmika) moe “tala ‘oe tahi/vai” (haitōtaināmika).

‘Oku toe ‘iloa ‘ae “ha‘a faiva toutai” (kau toutai, ‘aia koe kau toutaivaka moe kau toutaiika) koe “ha‘a faiva kaivai” (kau kaivai) – ‘o ‘uhinga ko ‘enau “kai” ‘ae “vai”/”tahi” – ‘aia koe “kai” koe lea heliaki kihe me‘a ‘oku nau “‘ilo lahi taha kiai mo poto lahi taha ai.” ‘Oku ‘uhinga ‘ae “vai” kihe “tahi” – ‘aia ‘oku fakanounou kihe “tai” (‘Oku ui ‘ae konokona ‘ae tahi koe “taitai” [“tahitahi”]) – ‘o hangē ko ‘ene ‘asi he lea koe “toutai” – ‘aia koe mafuli ia mei he lea koe “tautahi” (moe lea koe “tou” mei he lea koe “tau”) – ‘o ma‘u ‘ae lea koe “toutai” moe “tautai” – ‘aia koe ma‘u mei he lea koe “tautahi”) – ‘o ‘uhinga ko ‘enau ngāue tu‘uma‘u koe “tau moe tahi” (war with the sea).

Na‘e ui ‘ae kau tau ‘a Tāufa‘āhau mei Vava‘u Lahi, Ha‘apai Veu (mo ‘Eua) koe “Tautahi” (Warriors of the Sea) kae “Tau‘uta” (Warriors of the Land) ‘a Tongatapu, Tonga‘eiki pē Tongalahi.

ANFF leva ē malanga kae tau,
‘Ofa manatu moe ‘ānau ma‘u,
Ka tau toki hoko atu.