Finefeuiaki ^Featured

1. Finefeuiaki tūkunga 'o e 'amanaki
Ke u sia kupenga 'o 'ikai to e heliaki
Ko hoto kakala fungani ki he ma'alali
Ki ha tātāsili mei he 'aneafi
Hoto 'ofa he langakali ko 'Ofa Mateaki
Tauleva ē fononga pilikimi fakalangi

2. Kupenga heulupe he Mo'unga-'oe-'Olive
Ka e pango ne angi he matangi Toafa'one
Pea kuo ne fofola he Fala-'o-Setane
'O anginanoa ai ē sola moe kakala vale
Si'i heilala loa pe'i ke piliote ā hē
Ka e hu'ihu'i 'e he 'ea 'Esi 'o Sālote

3. Si'i manuekaho pe'i ke fakamolemole pē
Ka e vete si'ota hua ne tauele
'O 'ikai te u hu'ia pē 'e to e vete
Taumaiā ne u misi 'e anga pehē
'Utulongoa'a sila'i he maa'imoa kuo lava
He laukau'anga 'o 'eni to'utangata

Tau:

'E Kolohea mo Longolongofolau
'Alo-i-Talau moe 'Utukalongalu
Ka kuo muna pē 'a ho'omo ha'u
'Ē ki Lotopoha mo hono kaha'u
Kuo vetekina 'e he kapo moe toki fa'u
Hoku salusalu tu'uta 'i Loto Neiafu

Ko e Ki‘i Fakamatala Nounou:

‘E lava ke taku ko e ta‘anga hiva fetau ‘eni (poetry of rivalary), ‘o hangē ko ‘ene lau ki he fa’ahinga ‘e ua ‘o e punake, ‘a ia ko e punake kakato mo e punake kapo, ‘o ‘uhinga ‘a e punake kakato ki he punake ‘oku lahi ‘ene ‘ilo, poto mo e taukei mo e punake kapo ki he punake ‘oku si’i ‘ene ‘ilo, poto mo e taukei.

‘O tukukehe ange ‘a e ngaahi mātanga tupu‘a mo faka‘ofo‘ofa ‘o Holonga, Kolonga mo Kolovai ‘i Vava‘u Lahi mo Tonga Tapu, Tonga ‘Eiki pe Tonga Lahi, ‘oku to e lave ‘a e ta‘anga ki he ngaahi tufunga mo e faiva tu‘ufonua, ‘o hangē ko e tufunga siakupenga mo e faiva heulupe.

‘Oku ui foki ‘a e kupenga heulupe ko e “muniao,” ‘a ia ‘oku lahi ‘ene he‘aki he tufunga lea mo e faiva lea ka e pehē ‘a e faiva ta‘anga, ‘o hangē ko e lea ko e kūkūkaunaka, mānoa, motumānoa, mounu, mounuvaoa, alaisia alaikolonga mo e ha fua.