Teaufāngofulu Ta‘u Kolisi ko Tupou & Sau Faupula ko e Amaloa ^Featured

Teaufāngofulu Ta‘u

Fatu ‘e Palōfesa Hūfanga Dr ‘Ōkusitino Māhina (2006)

1.    Ke fakatapu moe takafalu
    Kau siva he langi kuo tau
    Kei tu‘uloa Kolisi ko Tupou
    Hokosia teaufāngofulu ta‘u
    Koha supiesi kuo fatufatu
    Ke ma‘alali mo fakamanatu

2.    Kuo tu‘utai he ngaahi ‘eioni
    He langiloa ‘ae Lopa‘aioni
    Maeakafa na‘e teke langi
    Tau‘atāina he me‘a fungani
    Mokoi ke maama hono kakai
    Fakapo‘uli te nau ‘auha ai

3.    Ama ne hulu he ‘Otu Tonga
    Ke matea mai ‘ae teolema
    Sikaina ‘oe saienisi moe faiva
    Lea ‘eukaliti moe kalāsika
    Fua siomita lau ‘asitalōnoma
    Kai ia ‘ae kau matematika

4.    Tātā tuli vaka ka tau soko
Koe ‘opiesi ‘eni kuo hiliō
Pukea ‘a fufula si‘eta loko
Tonga ma‘unga kihe loto
Kau ta‘e‘iloa kau helohelo
Mateaki lī‘oa si‘eta moto

Tau:    Lepa-‘i-Fualu Sia-ko-Toloa
    Na‘a kuo fai ‘apē ha latanoa
    ‘Alu ē ‘aho mo hono talanoa
    Kau afe si‘i kihe Penatina
    Uhu ‘ete ‘ofa kihe Pōmona
    Veifafana fakalongo ki kafa
    ANFF ‘uma le malanga tōfā
 
Sau Faupula Koe Amaloa

Fatu ‘e Palōfesa Hūfanga Dr ‘Ōkusitino Māhina (2006)

1.    Ke aofaki moe tuputupu‘a
Kau talanoa mo tukufua
Kaveinga ‘ene tu‘u tauhoa
Sau Faupula koe Amaloa
Kolisi ko Tupou koe ‘Ālifa
140 ta‘u keta fakamanatua

2.    Fua ne tonu fa‘u ne malu
Fatu ne fai ‘ihe ‘Otu Lau
Fa‘unga ne fakatou mata‘u
Ko Tu‘i Neau he Ono-i-Lau
Koe Tu‘i Pulotu ‘i Matuku
Fai‘anga ‘ete fakana‘una‘u

3.    Kuo tava pea kuo oso
Tama tu‘u keta fakauō
‘Aho ni kuo fakatouato
Tapa ‘ihe Sī hono huelo
Ulo he ‘Otuī ‘i Tukulalo
Tā ‘āpē koe fetu‘u‘aho

4.    Koe talafu ē kuo mofisi
Koe mataafi ia na‘e ‘esi
Taau pē tofua‘a moe lei
He Kelēsisi moe Tu‘itahi
Maamaloa he ‘Otu ‘Ailani
Loumaile kuo fakalekesi

Tau:    Kavafusi ē mo ‘Akautakina
Kuo tangane ‘ae teu tangata
Hisitōlia ‘ena moe teolosia
Fakatou Lo‘au moe ‘Aisea
Ne Vavanga mo Mataloloa
Ngaohi Mo‘ui hono ‘uhinga
‘Uha lōvai ne tō koe ‘ofa
Poto hā he ‘aho katoanga   
KO E KI‘I FAKAMATALA NOUNOU

Na‘e fakafatu/fakafa‘u ‘ae ongo ta‘anga hiva viki koe “Teaufāngofulu Ta‘u” moe “Sau Faupula Koe Amaloa” ‘e Palōfesa Hūfanga Dr ‘Ōkusitino Māhina ma‘ae Kautaha Kolisi Tutuku ‘ae Kolisi ko Tupou ‘a ‘Oniteliō-Pōmona ‘o Kalefōnia ‘i ‘Amelika. Na‘e fokotu‘utu‘u, fakahoko mo talitali ‘ehe Kautaha Kolisi Tutuku ‘ae Kolisi ko Tupou ‘a ‘Oniteliō-Pōmona ‘ae kātoanga ma‘alali mo fakamanatu ‘oe hokosia ‘ae ta‘u 140 ‘oe Kolisi ko Tupou ‘i ‘Amelika he ta‘u 2006 – ‘aia ko hono kaveinga koe: “Ta‘u Teaufānoa ‘oe Kolisi ko Tupou mo Hono Mo‘unga‘i Tangata ko Faifekau Sau Faupula.” Na‘e fakafasi /fakaafo ‘ae ongo ta‘anga hiva viki ni ‘e Palōfesa Hūfanga Dr Māhina & Helu Dr Siosaia Langitoto Helu mo hiva ‘ehe Kautaha Tutuku ‘ae Kolisi ko Tupou ‘a ‘Oniteliō-Pōmona.

‘Ofa ongo moe manatu loto,
Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Moana University (MU) (formerly Tonga International Academy [TIA]) &
Vava ‘u Academy for Critical Inquiry and Applied Research (VACIAR)