Malanga Tuku Hopo 'Eiki Minisitā Fonua, Tu’ipelehake mo e Uitou Fifita Holeva 'i he 'Api Ko Fatai Featured
'Api Ko Fatai
Nuku’alofa, 23 Siulai 2015. ‘Oku lolotnga lele 'a e malanga tuku 'a e ngaahi fa'ahi 'i he hopo ‘i he vaha’a ‘o e Minisitā Fonua, Tu’ipelehake pea mo e Uitou Fififta Holeva Tuku’aho ‘a ia ko e hoa ia ‘o e Tu’ipelehake kuo ne pekia Pilinisi Tu’ipelehake (Mailefihi).
Ko e hopo foki ‘eni ‘i he ‘Api ko Fatai ‘a ia ‘oku ‘ikai sola kiai ha taha ‘i he fonua ni ko e me’a’anga ia ‘o e Tu’ipelehake talu mei tuai.
‘Oku makatu’unga foki ‘a e hopo ni ko hono ‘eke ‘e he uitou ‘ene totonu ki he ‘api ni ‘a ia ko e kātoa ‘a e ‘Api Ko Fatai ‘o makatu’unga ‘i he ‘uhinga koia ‘oku uitou pea ‘oku ‘i ai ‘ene totonu ke fakauitou ‘i he ‘api ni. ‘Oku fakakikihi’i foki ‘a e ‘eke ko’eni ‘e he tafa’aki ‘a e Tu’ipelehake ‘o e ‘aho ni Tu’ipelehake Sione Ngū pea ‘oku laini tatau ‘a e fakakikihi koia mo e tu’utu’uni kuo fakahoko ‘e he ‘Eiki Minisitā Fonua ‘o e ‘aho ni ‘a ia ‘oku fehangahangi ia mo e tafa’aki ‘a e Uitou.
Fakatatau ki he puipuitu’a ‘o e hopo ni pea fakatatau ki he Fakamatala mei he Potungaue Fonua & Savea, na’e ‘osi vahe’i ‘a e konga ‘apikolo ‘o Pilinisi Mailefihi (Tu’ipelehake ne toki pekia) mei he ‘api ko Fatai pea ko e luti pe ia ‘e 1 pole 30 (sikuea mita ‘e 1618.7) ‘o fakatatau ki he lao kelekele ‘e hono ta’okete Pilinisi ‘Uluvalu lolotonga ia ‘oku ne ma’u ‘a e hingoa Tu’ipelehake pea te’eki kene pekia. Ko hono vahe’i ko’eni ko e ‘inasi ia ‘o hono tehina Mailefihi ‘a ia koe ‘apikolo lēsisita.
Ne a’u mai ki he taimi na’e ‘ikai fai ha ‘amanaki kiai ‘o hoko ‘a e si’i pekia ‘a e Tu’ipelehake (‘Uluvalu) pea hoko hake ‘a Mailefihi ki he Hingoa Tu’ipelehake. Na’e fakahoko ai ‘a e feinga ‘a Tu’ipelehake (Mailefihi) ke fakataha’i pe ‘a e konga kuo ‘osi vahe’i mo’ona mo e toenga ‘o Fatai he kuo mahino koia kuo hoko hake ki he Hingoa.
Na’e tali ‘a e kole ko’eni ‘e he Minisitā Fonua ‘o e ‘aho koia ke fakataha’i ‘a e konga na’e vahe’i ‘o lēsisita mo e toenga ‘o Fatai. Kaikehe ne a’u mai ki he pekia ‘a Tu’ipelehake (Mailefihi) pea fakahoko ai ‘a e ‘eke ko’eni ‘a e Uitou ‘o fakamahino mei he ‘Eiki Minisitā Fonua ‘o e ‘aho ni na’e hala ‘a e tu’utu’uni ‘a e Minisitā Fonua kimu’a pea ko Fatai koe ‘api tukufakaholo pe ia ‘o e Hingoa Tu’ipelehake pea ‘oku totonu pe ‘a e uitou ke fakauitou ‘i he konga na’e ‘osi vahe’i kia Pilinisi Mailefihi kimu’a pea hoko ki he hingoa Tu’ipelehake.
‘Oku mahino lelei pe foki ‘oku lisi ‘e he Kautaha ‘Ea Nu’usila ‘a e konga lahi ‘o e ‘api ko Fatai pea koe konga ‘e he Kautaha Digicel ‘a ia ‘oku kau ‘i he hopo ni mo e ngaahi ‘eke fakapa’anga ‘o kau ai mo e ngaahi totongi lisi fekau'aki mo e 'api ni mo e ngaahi 'eke fekau'aki kehe pe.
‘E veteki kotoa ‘eni mei he Fakamaau’anga Lahi pea koe Malanga tuku ‘a e ngaahi fa’ahi na’e fakahoko ia he ‘aho ni Tu’apulelulu ko hono 23 ‘o Siulai pea toki faka’osi ki he Falaite 24 ‘o Siulai ai pe. ‘E hili kotoa ‘eni pea toki fakahoko ha tu’utu’uni aofangatuku ‘a e Fakamaau Lahi.
‘Oku Fakafofonga’i ‘a e Tama Tu’ipelehake ‘e William Clive Edwards pea Fakaofofonga’i ‘e Petunia Tupou ‘a e Uitou Fififta Holeva pea ko e ‘Ateni Seniale Le’ole’o leva ‘Aminiasi Kefu ma’a e Pule’anga mo e ‘Eiki Minisitā Lao. 'E hoko atu pe hono muimui'i 'e he ongoongo ni 'a e tu'unga 'o e fakatonutonu ko'eni.
