Hao ‘a Poasi Ngaluafe mei he tukuaki’ tamate tangata ‘i he faka’uli konā ^Featured

Ko e tu'utu'uni foki 'eni 'a e Fakamaau Lahi 'i he Fakamaau'anga Lahi 'i he 'aho Falaite 21 'o 'Epeleli 'o e ta'u ni 'a ia koe 'aho Falaite pe ia 'o e uike atu.

Na’e hoko foki ‘eni ‘i he hengihengi Sapate ‘aho 8 ‘o Mē 2016 ‘i he Hala By-Bass ‘i Longolongo ‘a ia na’e faka’uli mai ai ‘a Ngaluafe ‘i ha me’alele ‘o ‘ikai kene fakatokanga’i kane malaki ha matāpule na’e tokoto ‘i he loto hala ‘o pekia ai pe.

Na’e faka’ilo foki ‘a Ngaluafe ki he hia ko e tāmate tangata lolotonga ‘oku faka’uli konā kava malohi pea na’e toe tanaki atu kiai mo e faka’ilo ki he faka’uli konā kava malohi ‘o laka hake he lahi ‘oku tu’utu’uni ‘e he lao.

Na’e tali halaia ‘a Ngaluafe ki he faka’uli konā kava malohi ‘o laka hake he lahi ‘oku tu’utu’uni ‘e he lao pea na’e tu’utu’uni ai ‘e he Fakamaau’anga kene mo’ua.

Neongo ko’ene toki fuofua mo’ua eni ‘i he Fakamaau’anga na’e tu’utu’uni kene totongi ‘a e pa’anga ‘e $1000 makatu’unga he hulu e kava malohi na’a ne ma’u pea ka ‘ikai pea tene ngaue pōpula ki he mahina ‘e 2.

Kaikehe na’e tukuange ‘e he Fakamaau’anga Lahi ‘a Ngaluafe ‘i hono faka’ilo ia ki he mate ha tangata makatu’unga ‘i he’ene faka’uli konā ‘o fakatupu ‘a e mate ko’eni.
Na’e makatu’unga hono tukuange ‘o Ngaluafe ‘I he ‘ikai ke malava ‘e he tafa’aki ‘a e Talatalaaki ‘o fakamo’oni’i ‘a e fehalaaki ‘a Ngaluafe ‘i he tukuaki’i ko’eni.

Na’e ‘ikai malava ke fakamo’oni’i na’e lele lahi pe ko ha’ane malava ke sio ki he pekia ke malava mei ai ha’ane fakahoko ha me’a ke ‘ikai tau ai ‘a e me’alele he pekia‘o tupu ai ‘a e mole ‘ene mo’ui.

Ko Poasi Ngaluafe foki koe ‘Ofisa Ma’olunga ia he Potungaue Toutai pea koe ta’u lahi ‘ene fakahoko fatongai ki he Pule’anga Tonga.

Ko e hopo hia Fika CR 113 ‘o e 2016 pea na’e fakafofonga’i ‘a Ngaluafe ‘e William Clive Edwards Jr. pea ko ‘Elisapeti Langi ma’a e Talatalaaki 'a e Kalauni.