'Ikai tali tangi 'a Mateni, Laucala Tapueluelu, Solomone Palu mo e Kele’a: Ofi he kuata miliona e mo'ua ^Featured

Ko e tangi foki ‘eni fekau’aki mo e tu’utu’uni ‘a e Fakamaau Polisi ko Paula Tatafu ‘i he Fakamaau’anga Polisi ‘i he ta’u 2013 ke mo’ua ‘a e kau faka’iloa pea totongi mo e maumau ki he laui’i kovi’i mo hono takihala’i ‘a e kakai ‘i ha tohi ki he ‘Etita ‘a Solomone Palu na’e pulusi ‘e he Nusiepa Kele’a ‘i he ta’u 2013.

Na'e tangi foki 'a e kau Faka'iloa 'o fakahoko  'i Me 'o e ta'u ni ki he Fakamaau'anga Lahi pea tu'utu'uni ai 'e Fakamaau Lahi Micheal Scott 'i ha tala tu'utu'uni ‘i he Fakamaau’anga Lahi ‘i he 'aho 6 'o Me 2016 'e 'ikai tali 'a e tangi ko'eni ko e 'ikai ha makatu'unga lelei pea tu'uma'u 'a e tautea 'a e Fakamaau'anga Polisi pea tanaki atu kiai mo e fakamole 'a e Talatalaaki 'i he Fakamaau'anga Lahi.

Ko e tu'utu'uni 'eni 'a e Fakamaau'anga Tangi ke tamate'i 'a e tangi ko'eni hili hano fokotu'u atu mei he Loea 'a e Kau Faka'iloa Siosifa Tu'utafaiva ke fakafoki pea tamate'i 'a e tangi ko'eni koe 'ikai ha makatu'unga ke fakahoko 'aki ha tangi.

Na’e ‘eke foki ‘e he kau Talatalaaki ‘e toko 7 ‘a ia ko e kau memipa ‘eni ‘o e Kapineti ‘i he Pule’anga ‘o Tu’ivakanō ‘a e taki pa’anga ‘e $10,000 ki he kau faka’iloa. Ko e ngata’anga pe foki ‘eni ‘o e tautea ‘e foaki he mafai ‘o e Fakamaau’anga Polisi pea na’e tali ‘a e ‘eke ko’eni ‘i he Fakamaau’anga Polisi ‘i Siulai 2013.

Na'e pau ai ke tu'utu'uni ke totongi 'a e maumau tukukehe ange ‘a e ngaahi totongi makehe mo e ngaahi fakamole ‘a ia na'e tananaki ‘o a’u hono fakafuofua ki he pa’anga ‘e $249,442 (Matangitonga, 14 Sune 2013).

Ko e tohi foki ‘eni ‘a Solomone Palu ki he ‘Etita ‘o tukuhifo mo laui'ikovi'i ‘a e Palēmia ‘o e ‘aho koia Lord Tu’ivakanō mo e Kau Minisitā ‘e toko 6 ‘a ia na’e kau kiai ‘a William Clive Edwards, Dr. ‘Ana Taufe’ulungaki, Dr. Viliami Uasike Latu, Fe’ao Vakatā, Sione Sangster Saulala mo Samiu Kuita Vaipulu.

Ko e tohi ‘a Solomone Palu ‘o tukuaki’i ‘a e Kau Memipa ‘o e Kapineti ‘oku nau ngāue hala’aki honau mafai pea nau toe ngauehala’aki ‘a e pa’anga ‘a e fonua ka na'e 'ikai malava ke fakamo'oni 'eni 'e he fa'ahi 'a e kau Faka'iloa 'i he hopo ko'eni. Na’e fakalea foki ‘a e tohi ni ‘i he founga ta'eufi mo ‘ikai fakamatāpule pea na’e tupu ai hono fakahoko ‘a e fakatonutonu ko’eni.

Na’e loea ‘aki foki ‘e he kau Talataaki ‘a William Clive Edwards Sr. pea na’e fakafofonga’i ‘e Samuela ‘Akilisi Pohiva ‘a Solomone Palu mo e tafa’aki ‘a e kau Faka’iloa.

‘Oku mahino foki koe tu’utu’uni ko’eni ‘a e Fakamaau’angaTangi ‘i he pongipongi ‘o e ‘aho ni ‘oku 'oku kei tu'uma'u pea 'a e mo'ua 'i he Fakamaau'anga Polisi tanaki atu kiai mo ha ngaahi totongi 'i he Fakamaau'anga Lahi (Supreme Court) hange koia 'oku 'oatu 'i 'olunga pea 'e toe tanaki atu kiai mo e fakamole ‘i he tangi ko'eni ‘a ia ‘e hiki hake ai pe ‘a mo’ua ‘o e kau faka’iloa ki ha fika ‘oku toe lahi ange 'o fakafuofua ki he pa'anga 'e 250,000.00 (kuata miliona) pe ofi kiai pe lahi hake ai.

Ko e Fakamaau'anga faka'osi pe 'eni ke fai kiai ha tangi 'i he keisi ko'eni pea ko'ene tu'u 'i he taimi ni kuo pau leva ke fakahoko hono totongi 'o e mo'ua pea ka 'ikai ko e fakatautuki 'a e koloa 'a e kau Faka'iloa.

Na’e fakafofonga’i foki ‘a e tafa’aki ‘a e Talatalaaki 'i he hopo Tangi ko’eni ‘e William Edwards Jr. pea Siosifa Tu'utafaiva ma'a e kau Faka'iloa.