Foaki ‘e he Palēmia ‘a Polata’ane ki Pilitānia neongo koe koloa ‘a e Fale ‘o e Tu’i ^Featured

Ko hono foaki ‘eni ‘e he Palēmia lolotonga ‘a e fakataha ‘a e Kau Minisitā ki Muli ‘o e ngaahi fonua memipa ‘o e Kominiueli ‘a ia ‘oku lele fakataha mo e fakataha ‘a e kau taki ‘o e Kominiueli ‘oku lolotonga fakahoko ‘i Lonitoni.

‘Oku mahino pe foki ia ki he tokolahi ‘o e fonua ni ko Polata’ane koe koloa ia ‘a e Fale ‘o e Tu’i pea na’e fakafoki ‘eni ki he Fale ‘o e Tu’i hili a e mavahe ‘a e misiona mo e ‘Ofisi Faka-Haikomisiona ‘a Pilitānia ki Tonga ni ‘i he ta’u 2006.

Ko e ‘uhinga lahi foki ‘a e mavahe ‘a Pilitānia ‘i he ‘uhinga fekau’aki mo e lahi ‘a e fakamole ‘enau ngaahi misiona ki muli kae mafuli ‘o fakafeitu’u ‘a e ngaahi fonua iiki ange pea na’e pau ai ke fakamalumalu ‘a Tonga ni ia ki he ‘Ofisi Haikomisiona ‘a Pilitānia ‘i Fisi ‘a ia ‘oku lele mai ‘aki ‘o a’u mai ki he ‘aho ni.

‘Oku te’eki ke mahino ‘oku ‘i ai ha liliu ‘i he Tu’utu’uni Ngāue ‘a Pilitānia ki muli (Foreign Policy) ‘i he vā fengāueaki mo e ngaahi fonua ‘o e Pasifiki ke makatu’unga mei ai ha’a ne mahino tenau foki mai ki Tonga ni he ‘oku kei ‘i ai pe honau ‘Ofisi ‘i Fisi mo Nu’usila pea ‘oku fakahoko ai ‘a e fengāue’aki mo Tonga ni.

‘Oku faka’ohovale foki ‘a e foaki ko’eni ‘e he Palēmia ‘a Polata’ane ‘i hono mafai koe Minisitā ki Muli ‘a e fonua lolotonga ’a e fakataha ko’eni he ‘oku mahino foki ‘i he taimi tatau koe koloa ‘eni ‘a e Fale ‘o e Tu’i tukukehe ange kapau kuo 'osi fai ha femahino'aki kiai.

‘Oku ‘i ai ‘a e hoha’a ki he kaveinga ni he ‘oku totonu ke ma’ala’ala ki he kau taki ‘a e anga ‘o e fetu’utaki faka-tipilometika pea mo e Tu’utu’uni Ngāue ki muli (Foreign Policy) ‘a Pilitānia pehe kiha fa’ahinga ta’au faka mamani lahi pe faka feitu’u ‘e matamata ai ha maliu ‘enau Tu’utu’uni Ngāue ki muli ki he Pasifiki pea mahino ai tenau foki mai ki Tonga ni.

‘Oku totonu ‘i he anga ‘o e vakai ‘a e tokolahi ke ‘uluaki mahino ‘eni kimu’a pea toki fakahoko ‘a e ngaahi foaki pe fakaafe pehe ni pea ke malu’i ‘a e ‘ata ‘o e fonua mo ‘ene tipilometika.

Kapau kuo 'osi fai ha femahino'aki ia ki heni mo e Pule'anga Pilitānia pea faka'ofo'ofa ka 'oku fo'ou he 'oku te'eki ke talaki 'eni ki he kakai 'o e fonua pe 'e ongona 'i he ngaahi fokotu'utu'u ngāue 'a e Pule'anga.

‘Oku ‘ikai foki ke fai ha lau ia heni ki hono foaki ‘o e koloa ‘a ha tokotaha kehe ‘oku te’eki kene fakamafai’i mai pe tene ‘ilo kiai.