Tali ‘a Clive Edwards ki hono lau’ikovi’i ia ‘e Tilila Sumchai mo tukuhifo ‘a e ngeia ‘o e Fakamaau’anga ^Featured

Fakatatau ki he fakamatala ‘a Edwards, ‘oku mahino kiate ia ‘oku ‘ikai ko e fefine pe ko’eni tokotaha pe ‘oku ne ngāue’aki ‘a e hingoa ‘o’ona ka ‘oku ‘i ai mo e ni’ihi kehe ‘oku nau ngāue’aki ‘a e hingoa ko’eni ke fai’aki hono tukuhifo mo tapalasia ‘o e kakai ma’u tu’unga tokolahi pea tafunaki mo e loto taufehi’a ‘iate kinautolu mo e loto ke fakahoko ha sauni.

‘I he fakamatala ‘a Edwards ‘oku mahino mei he founga lea ‘a Sumchai ‘a e ta’efaka’ap’apa, ta’eufi mo e ta’etokai’i pea ‘oku fu’u ‘ilonga ‘a e ‘ikai ko Sumchai tokotaha pe ‘oku ne ngāue’aki a e hingoa ko’eni mo fai 'a e ngaahi tohi he ‘oku ‘ikai ke hokohoko lelei (consistent) ‘ene fakamatala he kapau ‘oku ‘i ai ha taha pehe ia ke feliuliuaki ‘ene sipinga ‘o fakafou ‘i he’ene fakamatala pea ‘oku mahino ‘oku ‘i ai ‘a e fehalaaki mo hono ‘atamai.

‘I he fakamatala ‘a Edwards ‘oku ‘ikai kene muimui ‘i he mitia faka-sosiale ka ‘oku ne ma’u ‘a e tatau hono ngaahi tukuaki’i 'o'ona mo hono lau’ikovi’i ia e Sumchai pea ‘oku ta tu’o lahi. ‘Ikai ngata ai ka ‘oku launga ange ‘a e tokolahi ‘o fekau’aki mo e ngaahi fakamatala kapekape mo tukuhifo mo lau’ikovi’i 'o kinautolu ‘e he fefine ni ‘a ia ‘oku mahino mei he’enau fakamatala ‘a e hangē ‘oku lotu ‘a e fefine ni ia kia ‘Akilsi Pohiva.

“Oku sai pe ‘ene lea mai ‘ana kiate au ka ‘oku ou hoha’a ko’ene tukuhifo ‘a e ngeia ‘o e Fakamaau’anga pea ‘oku faka’ofa mo ma’ulalo ‘a e ‘ikai ke ‘uhinga kiate ia ‘a e fa’unga ‘o e Fakamaau’anga mo e lao ‘o e fonua,” koe fakamatala ia ‘a Edwards.

Na’e pehe foki ‘e Edwards koe me’a ‘oku fai ‘e Sumachai ‘oku ‘osi maumau lalo pe ia ‘a ia ko’ene tukuhifo ‘a e ngeia ‘o e Fakamaau’anga (Contempt of Court) he ‘oku ne tukuaki’i ‘i he taha ‘o ‘ene ngaahi tohi ‘oku hanga ‘e Edwards ‘o mapule’i (manipulate) ‘a e Fakamaau’anga he ‘oku ne tukuaki’i ko e mo’ua pe ‘a e kakai ‘oku poupou mo muimui kia ‘Akilisi pea 'oku 'uhinga leva ia ‘oku kakaa’i leva ‘e Edwards ‘a e lao ‘o hange koe ngaahi hopo lau’i kovi’i ‘o ngāue ‘aki hono poto mo ‘ene taukei.

'Oku faka'amu 'a Edwards ke mahino kia Sumachai mo hono kau muimui koe Fakamaau'anga 'oku 3 pea 'oku 'alu mei he Fakamaau'anga Polisi ki he Fakamaau'anga Lahi pea mei ai ki he Fakamaau'anga Tangi 'a ia 'oku tau'ataina 'o 'ikai hange koe mohe misi 'oku nau fai.

Na’e hoko atu ‘a Edwards ‘o pehe kuo a’u ki he ta’u ‘e 60 ‘ene ngāue fakalao pea ko hono fatongia ke fakafofonga’i ‘a e kakai ‘oku nau fiema’u ke fakafofonga’i lelei kinautolu pea ko’enau totonu fakalao ia mo faka-konistutone ke ‘eke honau ongoongo.

‘I he fakamatala ‘a Edwards na’a ne fakamahino ko e ngaahi hopo lau’ikovi’i ‘oku ne fakafofonga’i koe ki’i konga si’i pe ia ‘ene ngāue fakalao he ‘oku ne ngāue ki he ngaahi hopo ‘i he tapa kotoa pe ‘o e lao ‘i he Fakamaau’anga pea ‘oku ‘ikai sola kiai ‘a e kakai ‘o e fonua.

“Oku ne toe tukuhifo au mo hoku famili mo ‘emau ngāue ‘oku fakahoko ‘i he mo’ui ‘o tatau pe moha toe famili kehe ange ‘i he fonua ni pea ‘oku mau a’u ki he ngaahi tu’unga fakafiemalie pe ‘i he funga ‘o ‘emau kalusefai mo e ngāue lahi pea ‘oku te’eki kemau mo’ua pe tautea ‘e he Fakamaau’anga ko hano fakahoko ha hia ‘i he fonua ni hange ko hono tukuaki’i kimautolu ‘e he fefine ko’eni”, ko Edwards mai ia.

Na’e fakamahino ‘e Edwards ‘oku ‘ikai ke ta’ofi ia he fonua ni kapau ‘oku loto ‘a e fefine ni ke faka’ilo ia ki he ngaahi me’a ‘oku ne tukuaki’i ia kiai pea koe founga ia ke fakahoko pea ke founga ia tene tala 'a e mo’oni pea 'oku 'ikai ta'ofi ia 'eha taha 'a  Sumchai..

“‘Oku mahino ko e me’a ‘oku fai ‘e Sumchai ko hono teke ‘a e kakai kenau taufehi’a kiate au pea faka’ai’ai ke fakatupu ha loto sauni tokua ‘a ia ‘oku ‘ikai ngata ‘iate au ka ‘oku fai ki hoku famili mo e kakai ma’u tu’unga kehekehe ‘o a’u ki he kau takilotu ‘i he fonua ni moha taha pe 'oku 'ikai poupou kia 'Akilisi mo e PTOA.

“Ko e to’onga ‘eni ‘oku ne hulu’i mai ‘a e ta’au ‘oku hu’u kiai ‘a e fonua ni pea ‘oku ‘omai ‘e Sumchai mo kinautolu ‘oku hū mai hono hingoa ‘a e fakatātā ‘o e ngaahi fonua ‘oku fakailifia’i ke ‘oua ‘e fakahoko ‘e he kakai ha fakafepaki ki he Pule’anga pe tenau lea tau’atāina ‘aki ‘enau fakakaukau pea ‘oku mahino ia heni”, ko Edwards mai ia.

‘Oku tauhi ‘e Edwards ‘a e tatau ‘o e ngaahi tohi ‘a Sumchai ‘i he mitia faka-sosiale ‘o lau kovi kiate ia pea tukuaki’i kovi ia mo hono famili mo e kakai tokolahi ‘a ia ‘oku ne tui ‘oku ‘ikai kenau poupou ki he Pule’anga ‘o e ‘aho ni.

‘I he lau ‘a Edwards, ‘oku faka’ofa ‘a e kakai ‘oku takihala’i e he ngaahi tohi ko’eni he ‘oku ‘ikai ke mahino kiate kinautolu ‘a hono takihala’i kinautolu kenau taaufehi’a mo loto’i sauni he koe faka’osinga ‘o e ‘aho kapau ‘e a’usia ‘a e taumu’a ia ‘a Sumchai mo e ni’ihi 'oku mu'angutu (mouthpiece) 'aki 'e he PTOA ko kinautolu pe tenau inu hono melie pea ‘e kei faka’ofa ai pe ‘a kinautolu ‘oku muimui kuikui.

‘I hono ‘eke kia Edwards pe ‘oku fai ha ngāue fakalo ki he ngaahi tohi ‘oku fai ‘e Sumchai pea na’a ne malimali mo pehe mai -“ko e me’a pe ‘oku mahino mai ‘oku fu’u lahi 'a e lau’ikovi kuo fai ‘e he fefine ni he neongo ‘a e toi mai ‘a e ni’ihi ko’eni ‘i mui ka ko Tilila Sumchai ‘oku fakamu’omu’a mai pea ‘oku faka’ofa he koia ‘e kalusefai.” Ko Edwards mai ia mo’ene kata.

Na’e toe ‘eke fakapapau’i ‘ehe ongoongo ni kia Edwards pe ‘e fai ha faka’ilo pea na’a ne tali mai pe ‘ene kata “tau toki sio pe koe ha me’a ‘e hoko”.