Manavasi’i na’a hoko e loi ‘o Mo’oni Featured
Tangata’eiki,
‘Oku ou kole ke tu’u atu mu’a ‘eku tohi ko’eni mo fakaha ‘eku ‘ohovale moe fakatumutumu he malanga ‘a e 'emau Fakafofonga Vava’u 16 (Minisita Ngaahi Ngaue Lalahi) ‘i he ‘aho 17 ‘o Ma’asi ‘a ia koe Tusite ia ‘o e uike kuo’osi ‘o pehe na’e fai ‘a e nō tō kumala ‘a e Vahefonua Vava’u he ta’u kuo ‘osi pea na’e lava mai ‘a e ongo Minisita ‘a e Pule’anga ke fakahoko. Na'e toe ha foki na'e mole 'a e ngaahi koloa malu'i tu'unga 'i he noo ko'eni.
‘Oku ou ‘ohovale ‘i he malava ke fakangofua pe ‘e he Fale Alea ke tuku ange ‘a e fa’ahinga usu pehe ni telia na’a faifai kuo tau hahaka hake pe kuo hoko e loi ia ‘o mo’oni. ‘Oku ou fokoutua ‘i he Vahefonua Vava’u pea ‘oku ou ngaue ki tokanga pea na’e te’eki ai tu’o taha ke talaki ha tō kumala pe fakahoko ha nō ‘a e kau tō kumala ke fakapa’anga ha to kumala ke uta ki Pangopango.
Fakamalo lahi atu ki he ‘Eiki Nopele Tu’ilakepa ‘i hono taukave’i ‘a e mo’oni mo hono ‘ohake ‘a e me’a totonu he kapau na’e lahi ‘a e kumala ‘e ‘ikai a’u ‘a e totongi ki he pa’anga ‘e 50 ki he kato. Fakamalo foki kuo lava ke lele e vaka ki Pangopango ‘o kamata fetuku e fua e fonua pea kuo mau lave monu ai.
Na’a mau fanongo tonu atu pe ki he kamata hee ‘a ‘emau Fakafofonga ‘i hono fakatonutonu ‘e he ‘Eiki Nopele Vava’u pea mahalo koha founga faka kemipeini pe ka ‘oku fai 'a e hoha’a lahi na’a faifai kuo hoko e loi ‘o mo’oni he fonua ni.
Faka’apa’apa Atu,
Kula 'i Tokanga
Hala Mote
2 comments
-
Ko e ma'u pe kiai 'oku lolotonga 'i he Pule'anga 'a e 'api ko'eni pea 'oku tokanga'i 'e he Kautaha Maketi Talamahu 'a ia koe Poate ia 'a e Pule'anga. 'Oku 'osi kamata fetuku foki 'a e fua 'o e fonua ki he maketi ko'eni.
-
Kou kole atu ha taha pe ko e 'Etita mu'a fakamolemole kae 'omai ange 'a e pau fekau'aki mo e Maa'imoa Maketi 'i Ha'amoa 'Amelika !!!!!. Fanongo pe 'oku ma'u ia he tama Ha'amoa mali mai ki Vava'u!!!!. Anga fefe ia!!??.
Tokoni mai mu'a!