Tau kei hao pe mei he Covid-19 ^Featured

Fakatatau kia Dr. ‘Akau’ola, kuo ‘osi faka’atā atu ‘aneafi ‘a e kau pāsese koia ‘e toko 17 na’e tū’uta ‘i he ‘aho 22 ‘o Sune mei Vanuatu, na’e kolonitini ‘i he Kemi Taliai. Na’e fakahoko ‘a hono sivi tu’o tolu ‘a kinautolu ‘o mahino ‘oku nau hao kotoa pē.

‘Oku kei lolotonga kolonitini foki mo e kau pāsese ‘e toko 240 koia na’a nau tū’uta mai mei Nu’usila ‘i he Sune ‘aho 30 ‘i he Hotele Tanoa pea mo Makeke. ‘Oku kakato ‘a ‘enau ‘e 14 ‘i he ‘ahó ni, ‘a ia ‘oku to e ‘enau uike ‘e taha pea toki faka’atā atu ki nautolu ki honau ngaahi famili.

Na’e fakahā ‘e he Pule Lahi ‘o e Potungāue MEIDECC, Paula Pouvalu Ma’u ko e vakapuná hono hokó ‘e tū’uta ia ‘i he ‘aho 28 ‘o e mahiná ni. Kuo ‘osi fakapapau’i foki ‘a e vakapuná mei Nu’usila ka ‘oku kei fai ‘a hono siofi ‘a e tūkunga ‘oku ‘i ai ‘a e vailasi ‘i ‘Aositelelia, ka e toki mahino mei ai ha taimi ‘e tū’uta ai ha kau pāsese Tonga mei ‘Aositelelia.

Taimi tatau pē, ‘oku lolotonga ngāue atu foki ‘a e Pule’anga ki ha founga ki hono fakafoki mai ‘o e kau pāsese Tonga koia ‘oku nau kei tukuvakā ‘i Fisi, ‘a ia ‘oku tokanga lahi ki ai ‘a e Pule’anga koe’uhi ko e hikihiki tō ‘a e mafola ‘a e vailasi ‘i Fisi.

Tu’unga ‘oku ‘i ai ‘a e polokalama huhu malu’i Covid-19

Kuo a’u eni ki he toko 7625 kuo ‘osi fakahoko ‘a ‘enau huhu hoani (2nd dose). ‘Oku ‘i he ‘avalisi ko e toko 586 ‘oku huhu ‘i he ‘aho. ‘Oku fakafuofua ke kakato ‘a e polokalama huhu malu’i ko ‘eni ‘i he faka’osinga ‘o e mahina ko ‘Aokosi ‘o e ta’ú ni pē, kia tekinautolu na’e kau ‘i he ‘uluaki huhu.