Fakatotolo ki hono hu mai hotdogs "Chicken Franks Salchichas de pollo" ^Featured

‘I he ngaahi Mafai fakavavevave ‘o e Ma’u mafai Fakafonua ki he Me’atokoni ‘a ia ‘oku ha ‘i he kupu 13 ‘o e Lao ki he Me’atokoni 2014, koe‘uhi ke ta’ofi pe fakasi’isi’i ‘a e hoko ha faingata’a ‘e fakatu’utamaki ki he mo’ui ‘a e kakai pe holoki ‘a e tu’unga uesia kovi ‘oku fakatu’utamaki ki he mo’ui ‘a e kakai, fakatatau ki he ngaahi tu’utu’uni moe fokotu’u ‘a e kosilio fakafonua ki he me’atokoni ‘e faka’ataa ‘e he Ma’u Mafai Fakafonua ki he Me’atokoni ki he ngaahi pisinisi me’atokoni ‘oku nau hu mai e sosisi/hotdogs na’e ma’u ai e ‘uanga ke tapuni fakataimi ka e fai ha ngaue ki ai ki he malu ‘a e kau ma’ume’atokoni/consumers ‘i Tonga ni.

‘Oku kau atu foki heni mo hono tanaki/fakama’opo’opo kotoa e kalasi sosisi/hotdog ko eni na’e ma’u ai e ‘uanga mei he ngaahi falekoloa fakatau fakamovetevete kotoa pe ‘i Tonga ni ke faka’auha, pea ki he ngaahi koloa me’atokoni kotoa pe ‘o tautautefito ki he kakano’i manu ‘oku hu mai ‘e he kautaha ni kuopau ke sivi ke fakapapau’i ‘oku hoa moe ngaahi tu’utu’uni ki he Lao ‘o e Me’atokoni 2014 pea mo ‘ene Lao ngaue.

‘I he fengaue’aki fakataha e tafa’aki ki he me’atokoni ‘o e Potungaue Ngoue, Me’atokoni, Vao’akau moe toutai (MAFFF) pea moe Va’a ki he Konisiuma ‘o e Potungaue ki he ngaahi pisinisi iiki (Ministry of Commerce & Labour) pea mo e Potungaue ki he Tanaki Pa’anga hu mai mo e Kasitomu (Ministry of Revenue and Customs) fakataha mo e Potungaue Polisii kuopau ke nau ma’u e mafai ki hono fakamavahe’i pe to’o e sosisi/hotdogs kuo fakapapau’i ‘oku ‘asi ai e ‘uanga.

Pea ‘i he’ene pehe, ‘oku mau fakatokanga atu heni ki he ngaahi falekoloa fakatau fakamovetevete kotoa pe ‘oku ‘i ai ‘a e kalasi sosisi/hotdogs ko eni ko e “Chicken Franks Salchichas de pollo” ‘oku leipolo ‘aki e “Golden Maple”,kofukofu lanu pulu mo e bar code 82981093012 9, ke mou fetu’utaki mai ki he Va’a ‘o e Me’atokoni ki he fika 23-038 pe ko e Va’a ki he Konisiuma ki he fika 23-688 ke nau tanaki mai e ngaahi koloa koeni ke faka’auha.

‘Oku mau tuku atu ai heni ‘a e fakatokanga ki he kau konisiuma kotoape ‘i Tonga ni ke ‘oua te mou to e fakatau pe ma’u me’atokoni mei he kalasi sosisi/hotdogs kuo osi fakaikiiki atu i ‘olunga.

‘I hono aofangatuku, ‘oku mau kei fakamanatu atu ai pe heni ki he ngahi kautaha hu mai ‘o e ngaahi koloa me’atokoni ke fakapapau’i ko e ngaahi koloa me’atokoni kotoa pe ‘oku hu mai ki he Pule’anga ni kuopau ke fakakakato ‘a e Setifikeiti mei he Potungaue ‘oku nau fakamafai’i ‘a e Hao mo e Malu ‘a e Me’atokoni pea ‘oku nau fenapasi ki he Me’atokoni ‘i he fonua ko ia ke fakapapau’i ‘oku malu mo hao ‘a e koloa me’atokoni hu mai ki Tonga ni.

Kosilio Fakafonua ki he Me’atokoni