Hoko atu e vilita’e’unua ki ha mala’e tāpulu ‘e malava ke tu’u e konga ‘i tahi ^Featured

Ko e tu’utu’uni koia ‘a e Komiti Fokotu’utu’u ‘oku taki ai ‘a Lord Sevele ‘oku hā ngali fakapotopoto pea na’e mahino ki he fonua ‘e fai’aki ia ka ta koaa ia ‘oku te’eki pe ke maha ‘a e tangai vilita’e’unua ia ‘a e taki. ‘Oku ho’ata mai heni ‘a e mea malie ia ‘a ia ‘oku tuhu ki he vā faka-politikale ‘o e Palēmia ‘Akilisi Pohiva mo e Palēmia Malōlō Feleti Sevele.

‘Oku feinga pe ‘a Pohiva ke fakafepaki ki he ngaahi fokotu’utu’u ‘oku fakahoko ‘e Sevele kae ngalo ange ‘iate ia ‘e fua ‘a hono kanongatamaki ‘e he kau totongi tukuhau ‘o e fonua mo e ngaahi tokoni mei muli. Kuo hiki ‘eni mei he feinga ke fakamalōlō’i ‘a Sevele ki he helekosi no’ia holo he ngaahi fokotu’utu’u ‘oku fakahoko pea ‘oku ‘ikai fu’u mahino hono 'alunga.

Na'e fakahoko foki 'a e fakatonutonu 'i he Fakamaau'anga Lahi pea mahino mo e tu'utu'uni ka 'oku 'ikai 'asi mai e fai ha holomui pe tukulolo ki he Lao moe totonu.

Kuo talaki foki ‘e he Palēmia ‘i he uike kuo ‘osi ‘e tu’u ‘a e mala’e tāpulu fo’ou teuteu ki he sipoti ‘i Siumafua’uta pea koe mala’e tāpulu luo 18 ‘eni ‘a ia koe liunga ua ia ‘o e lahi ‘o e mala’e tapulu ‘i Manamo’ui ‘i he anga ‘etau vakai atu kiai.

‘Oku mahino mai foki ‘a e ‘elia ‘oku fakahangahanga ke tu’u ai ‘a e mala’e tapulu ‘a e Palēmia ka kuo toe hā mai e Tokoni Palēmia ia ‘o fakahā ki he ngaahi kautaha ongoongo he ‘aho ni ‘oku te’eki mahino ‘a e palani ia ko’eni. ‘I he’ene pehe leva ‘oku ‘ikai mama’o ‘eni mei he polokalama angamaheni koe ta’e palani moe fakapatuu he funga 'o e mafana.

Ko Siumafua’uta foki ‘oku taumu’a kiai ‘a e vilita’e’unua ko’eni ka ‘oku mahino ‘a e tu’unga ‘oku ‘i ai ‘a Siumafua’uta ‘oku tahi e konga lahi pea ‘oku fiema’u ‘a e tanu lahi kiai. ‘Ikai ngata ai ‘oku ‘ikai lahi ‘a e 'elia ko’eni pea koe konga lahi ai koe tongo 'o mahino 'e faka'auha 'o fepaki ia mo e moe toutou fakatokotoka mai 'a e Palēmia 'i he Letio he ta'u 2015 ke 'oua 'e faka'auha 'a tong0.

Ko e ‘elia matu'aki mahu'inga 'eni mo fakahisitōlia ‘eni ki he fonua pea ‘oku ‘i ai hono ngaahi tala fakatukufakaholo ‘oku mahu’inga fakafonua mo fakaako pea ‘oku mahino e fakafekapaki’i lahi ‘eni ‘e he kau fakatotolo fakaako (‘akiolosia) mo hisitōlia. Ko e tu'u'anga foki 'eni 'o e ngahi Sia Heulupe pea koe konga mahu'inga ia 'o e hisitōlia 'o e fonua.

‘Oku toe mahino pe foki koe kau tā lalahi ia 'i he taleniti tāpulu ‘e puke mai ‘a e pulu mei Siesia pe ko loto tahi. ‘Oku toe hāfoki mei he ‘esitimeti fakaangaanga ‘e holoki ‘aki tokua ‘a e meimei peseti ‘e 500% ‘a e fakamole mei he pa’anga na’e mei fakamole ki hono fakalelei ‘a e mala’e tapulu ‘Atele ‘a ia koe pa’anga ‘Amelika ‘e 6.2 miliona pea ke langa’aki tokua ‘a e mala’e tāpulu ko’eni ‘aki ‘a e pa’anga ‘Amelika ‘e 1.35 miliona.

‘E malava pe ke tau tui ki heni neongo ‘oku te’eki maau ‘a e palani mo fakapapau’i hange koe me’a ‘a e Tokoni Palāmia he ‘aho ni ‘okapau koha mala’e tapulu kiha Lautohi Pule’anga he koe mala’e tapulu lelei ‘oku fiema’u ‘a e ‘elia lahi moe pa’anga lahi kiai.

Ko ‘isiū mahu’inga heni ko hono tukuange ‘a e komiti fokotu’utu’u sipoti 2019 ke fakahoko ‘enau ngāue pea nofo ‘a e Pule’anga ki honau fatongia koe fakapapau’i ‘a e me’a fakapa’anga mo e ngaahi tokoni fekau'aki ‘o fakatatau mo e Lao Sipoti 2012.

Kapau koe ‘uhinga pe ia ke ofi ki he paaka Va’epopua mo teuteu ‘aki pea ‘oku toe fakaleleloto atu ‘a e ‘uhinga ia koia.