Faka’ilo Dr. Hilamani Hansen ki he Tikite 13 Fekau’aki mo e Ngāue Kākā Faka-‘Imikuleisoni ‘i ‘Amelika ^Featured

Ko Dr. Hansen foki koe fetu’u hopo foki ia kuo ‘iloa hono hingoa ‘i he ngaahi ngāue hala kuo tukuaki’i ia kiai fekau’aki mo e kākā, faka’amanaki mo hono lohiaki’i (scams)‘a e kakai ‘o e ngaahi matakali ‘o kau ai hotau kainga Tonga. ‘Oku tukupā foki ‘a Dr. Hansen tene malava ke foaki ‘enau nofo fonua pe koe sitiseni ‘i ‘Amelika ‘i he founga ko hono pusiaki ‘o e kakai lalahi (Adult Adoption). Kuo fakatokanga’i fakamamani lahi foki ‘a Dr. Hansen ‘i he ngaahi mītia ‘a e tu’unga ‘oku ‘i ai hono fakahū pilīsone ia pehe ki he’ene hopo ‘oku teuaki ke fakahoko.

Kautaha Americans Helping America mo e Native Hawaiians and Pacific Islanders Chamber of Commerce

‘Oku ‘ikai foki ke puli ‘i he tokolahi ‘a e toutou ‘asi mai ‘a e tangata ni ‘i he’ene uepisaiti (website) ko e Native Hawaiians and Pacific Islanders Chamber of Commerce ‘i he tu’asila koe www.phpi.us ‘o fakamatala mai ki he ngaahi monū’ia faka-‘imikuleisoni ‘e ma’u ‘eha fa’ahinga matakali pē ‘o kau ai hotau kāinga mei he Pasifiki kapau tenau fakahū ha’anau kole ‘o fakafou ‘i he’ene kautaha ko e Americans Helping America ‘a ia koe kautaha ‘eni ‘oku ‘ikai taumu’a ke mau ha tupu (Nonprofit Organization).
Na’a ne toe fokotu’u foki mo e Native Hawaiians and Pacific Islanders Chamber of Commerce tokua koe sino ia ‘e tokoni ki hono ako’i ‘a e ngaahi matakali mo fakataukei’i ki he’enau ma’u’anga mo’ui ‘o a’u ki hano tokoni’i ha’anau Pisinisi. ‘Oku kau heni mo hono fakataukei kinautolu ki he founga ‘e ma’u ai ‘enau nofo fonua ‘o fakafou ‘i hono pusiaki ‘o e kakai lalahi ‘oku kei ‘ova ‘e he kakai sitiseni ‘o ‘Amelika ‘o a’u pe ki he ma’u ‘enau nofo fonua.

Fakatatau ki he ngaahi fakamatala ‘a Dr. Hansen ‘i he taha ‘o e ngaahi vitiō kuo ne hiki ‘o tuku mai he You Tube pea mo ‘ene uepisaiti www.nhpi.us, ‘oku fakaafe mai ai ‘a Dr. Hansen ki he kakai Tonga mo e ngaahi matakali kenau kau ange ki he polokalama pusiaki kakai lalahi (Adult Adoption Program) ‘a ia ‘oku malava ai ke pusiaki ‘eha tokotaha nofo fonua pe sitiseni ‘Amelika ha kakai lalahi pea ‘oku fakalao foki ‘a e polokalama ko’eni.

‘Oku mahino foki ‘oku mo’oni heni ‘a Dr. Hansen ‘oku malava pea fakalao ‘eni ‘o fakatatau mo e Lao ‘a e Pule’anga ‘Amelika ka ‘oku toe hoko atu foki ‘a Dr. Hansen ia ‘i he’ene fakamatala heni ‘o pehe koe hili hono pusiaki ha taha ‘eha tokotaha sitiseni ‘Amelika pea ‘e mei ai leva ‘ene hoko koha sitiseni ‘Amelika. Makatu’unga ‘i he lahi ‘o e launga ‘a e kakai na’a nau totongi pa’anga kia Dr. Hansen mo ‘ene Kautaha Americans Helping America na’e fakahoko ai ha launga ki he kau ma’u mafai pea muimui’i foki ‘e he ngaahi kautaha ongoongo.

Fakatotolo Fakaongoongo ‘a e KCRA 3 News

Na’e fakahoko foki ‘e he Kautaha Ongoongo ko e KCRA 3 News ‘a Sacramento hono muimui’i ‘a e ngāue ko’eni ‘a Dr. Hansen ‘o a’u ki he polokalama pusiaki ‘a ia koe konga ‘eni ‘oku tukuaki’i mamafa ‘e he kau ma’u mafai ‘o e Siteiti Kalefōnia mo e Pule’anga ‘Amelika ‘oku ‘ikai mo’oni ai ‘a Dr. Hansen pea ko e polokalama ‘oku ne fakahoko koe polokalama kākā mo faka’amanaki (scams) fakatatau ki he fakatotolo maheke na’e fakahoko ‘e he ongoongo KCRA 3 News ‘a ia na’e lele’i ‘i he Televīsone ‘a Sacramento ‘i he ‘aho 23 ‘o Tīsema 2015.

Na’e mahino foki mei polokalama ko’eni ‘a e KCRA 3 News ‘oku tanaki pa’anga lahi ‘a Dr. Hansen ‘o fakafuofua ki he pa’anga ‘Amelika ‘e $10,000 USD ki he tokotaha kapau ‘e fakahū ‘enau kole nofo fonua ‘i he founga ‘oku fakahoko ‘e Dr. Hansen ‘i he’ene kautaha ko e Americans Helping America.

‘Oku malie lahi foki ‘a e taimi ‘oku fakamatala mai ai ‘a Dr. Hansen ‘i he’ene polokalama TV ‘i he’ene uepisaiti www.nhpi.us mo e you tube pea koe tangata fakamatala mo le’o afea ka ‘oku ‘i ai si’otau kāinga Tonga kuo nau tō ‘i he fakatauele ko’eni ‘a ia ko hono iku’anga koe iku launoa ‘enau ‘amanaki ka kuo mole ‘a e fu’u pa’anga lahi ‘i hono totongi ki he founga ‘oku ngaue’aki ‘e Dr. Hansen. ‘Oku toe fakamahino mai foki ‘e he KCRA 3 ‘i he’enau faka’eke’eke ‘o Dr. Hansen ‘oku te’eki ai ke ‘i ai ha taha ia ‘i he kakai ‘e laungaueau kuo totongi ‘enau pa’anga ‘o fakafou ‘i he polokalama pusiaki ‘o e kakai lalahi (Adult Adoption Program) kuo hoko koha sitiseni ‘Amelika he ‘oku ta’emalava ‘eni.

‘I hano faka’eke’eke ‘e he KCRA 3 News ‘i Sacramento ‘a e taha ‘o e kau loea ‘o Sacramento pehe ki ha fakafofonga mei he ‘Imikuleisoni na’e mahino mei ai ‘oku ‘ikai ngofua ‘eni ia ‘i he lao ke hoko ha taha kuo pusiaki ‘i he founga koe pusiaki ‘o e kakai lalahi ke hoko koha sitiseni pe koha tokotaha nofo fonua fakalao ‘i ‘Amelika.

Kole ki he ‘Ofisi Palēmia ‘o Tonga

Oku matalahi foki ‘a e ngāue kuo fakahoko ‘e Dr. Hansen he koe taha ‘ene ngaahi vitiō ‘i he’ene uepisaiti www.nhpi.us ‘oku ne hiki ai foki ‘a ‘ene kole fakahangatonu ki he ‘Ofisi ‘o e Palēmia ‘o Tonga ke fakahoko ha fengāue’aki ‘a ‘ene Kautaha mo e Pule’anga Tonga ke fakamafai’i ia mo ‘ene Kautaha kenau foaki ‘a e ngaahi ID (Identification Card) fakafonua ma’ae kakai Tonga ‘oku nau nofo ‘i ‘Amelika he ‘oku ‘ikai ke toe ngāue tokua ‘a e ‘Ofisi Konisela ia ‘a Tonga ‘i San Francisco.

Na’e tapou foki ‘i he vitiō ko’eni ‘a Dr. Hansen ki he Pule’anga Tonga kenau tokoni ange ke fakahoko ‘a e fengāue’aki ko’eni he ‘e ma’u faingamalie ai ‘a e kainga Tonga heni ke ma’u ‘enau sitiseni ‘i ‘Amelika. Na’a ne toe pehe foki koe konga ia ‘o e ngaahi fiema’u ki hono polosesi ‘o hano pusiaki ‘o ha taha ‘o a’u ai ki he ma’u ‘ene sitiseni kuo pau ke ‘i ai ‘ene ngaahi kaati ID ‘a ia ‘e tokoni lahi kapau ‘e ‘oange ‘a e mafai kene foaki mo ‘ene kautaha ‘a e ID fakafonua mei Tonga ke makatu’unga mei ai hano ma’u ka faingamalie ‘a e si’i kakai Tonga ‘i ‘Amelika.

‘I he lau ‘a Dr. Hansen koe taimi ‘e lahi ai ‘a e kakai Tonga ‘e nofo fonua ‘i ‘Amelika pea ‘e lahi ange ai ‘a e pa’anga tenau lī ki honau kainga ‘i Tonga. ‘Oku mahino foki mei he fakamatala ‘a Dr. Hansen ‘oku ‘i ai honau ngaahi ‘ofisi he meimei Siteiti kotoa ‘i ‘Amelika pe koe visone faka-‘Otua ‘eni ‘oku ne ma’u kene tokoni ki he ngaahi matakali kenau hoko koe tangata’ifonua mo e fefine’i fonua ‘o e Fonua ‘o e Tala’ofa ‘a ia ko ‘Amelika ia.

Puke ‘e he FBI ‘a e Ngaahi Naunau mei he ‘Ofisi Americans Helping America

Na’e puke ‘e he FBI ‘a e ngaahi naunau mei he ‘Ofisi Americans Helping America ‘i he ‘aho 23 ‘o Tisema 2015 ‘o kau ai ‘a e ngaahi Komipiuta ‘e 15 ‘a ia na’e fakahoko hono puke ko’eni ‘oku ‘i ai pe ‘a Dr. Hansen ‘i he ‘Ofisi. ‘I hano faka’eke’eke ‘e he KCRA 3 News ‘a Dr. Hansen lolotonga ‘a e hū ‘a e FBI mo e tohi puke ki hono ‘Ofisi na’a ne fakahā ‘ene fiefia he a’u ange ‘a e FBI he ‘oku faka’amu ke fakamahino ‘a e mo’oni pea ‘oku ‘ikai ha’a ne hala ‘e taha.

Na’a ne toe fakahā foki koe kilismasi fiefia ‘eni kiate ia he kuo a’u ange ‘a e FBi pea ‘oku ne faka’amu ke fakamahino ko’ene visone mo ‘ene ngāue ‘oku fakahoko koe tokoni ki he kakai ka ‘oku ‘ikai koha taumu’a kehe. Na’e kehe foki ‘eni ia mei hano faka’eke’eke ‘ehe KCRA 3 News ‘a e taha ‘o kinautolu na’e totongi pa’anga kia Dr. Hansen ‘a ia na’e tangi lo’imata’ia ‘a e muli ko’eni mo fakahā ‘oku faka’ofa ‘ene fanau ‘enau kole ange ke fakatau mai ha’anau me’a’ofa ki he Kilisimasi ka ‘oku ‘ikai ha pa’anga he kuo ‘ave ia kia Dr. Hansen ke feinga’i ‘aki ‘enau nofo fonua.

Ko e ngaue atu foki ‘eni ‘a e FBI (Federal Bureau of Investigations) hiki ia ha ta’u ‘enau muimui’i mo fakatotolo’i ‘a e ngaahi ngāue ‘a Dr. Hansen.

Fakahū Selo ‘o Dr. Hansen

Fakatatau ki he fakamatala ‘a e ongoongo ‘a e Potungāue Fakamaau’anga ‘a ‘Amelika (U.S Department of Justice) ‘i he’enau uepisaiti http://www.justice.gov/opa/pr/california-man-arrested-charged-adult-adoption-scheme-defraud-undocumented-immigrants ‘a ia na’e fakamahino ai na’e puke ‘e he kau polisi ‘o fakahū ki he selo (jail) ‘a Dr. Hansen ‘i he ‘aho Tu’apulelulu 11 ‘o Fepueli ‘a ia koe uike kuo ‘osi ia pea ‘oku faka’ilo ia ki he tikite ‘e 13 fekau’aki mo e fa’ufa’u ke fakahoko ha hia he kalasi kehekehe fekau’aki mo e polokalama pusiaki kakai lalahi loi mo e ngaahi fa’ufa’u loi ‘i he meili mo e uaealesi.

Ko hono fakahā faka’ofisiale ia ‘e he Loea mei he tafa’aki ‘a e Pule’anga (U.S. Attorney) Benjamin B. Wagner ki he Vahenga faka-hahake ‘o Kalefōnia. ‘Oku toe hā foki he fakamatala ko’eni ‘a e Potungāue Fakamaau’anga na’e tanaki ‘e Dr. Hansen ha pa’anga fakafuofua ki he $500,000 USD mei ha kakai ‘oku meimei toko 500 ‘i he funga ‘o e faka’amanaki mo e loi.

Kapau ‘e mo’ua ‘a Dr. Hansen ‘i he hopo ko’eni pea ‘e malava ke mo’ua pa’anga $250,000USD pe koe ngāue popula he ta’u ‘e 20 pea ko e fakatoloua. ‘E muimui’i ‘ehe ongoongo ni ‘a e tu’unga ‘o e hopo ko’eni.