Lahi pe poupou ke foki kihe foung Fili Fale Alea motu’a ^Featured

Na’e toe ‘ohake foki ‘eni lolotonga ‘a e ‘a’ahi Faka Fale Alea ‘o e ta’u ni ‘i he uike ni ‘i Houmakelikao.

Fakatatau ki he fakamatala ‘a e ongoongo ‘a e Letiō Tonga, na’e fokotu’u mei he fakataha ‘a Houmakelikao ke toe fakafoki ‘a e fili ki he founga fili motu’a ‘o fili fakakatoa pe ‘e Tongatapu ‘enau toko 10 pea tatau ki Vava’u ‘enau toko 3 mo e toko 2 ‘a Ha’apai kae si’aki ‘a e founga fili faka vāhenga hange koia ‘oku lolotonga lele ‘aki ‘i he taimi ni.

‘Oku tui ‘a e tokolahi koe founga fili motu’a tene ‘omai ‘a e kau fakafofonga ‘oku lelei ange makatu’unga ‘i he sio fakalukufua pea ke nofo ‘a e ngaahi kaveinga ngāue ‘i he langafonua fakalukufua ka e ‘ikai koe takitaha sio fakataautaha ‘a e kau fakafofonga ki honau vahenga fili.

‘Oku mahino mai ‘oku lahi ‘a e poupou ki he fakakaukau ko’eni pea ‘oku takimu’a ‘a Dr. Sitiveni Halapua ‘a ia koe Fakafofonga malōlō ‘o e vāhenga Tongatapu 3 ‘i hono teke ‘o e fakakaukau ko’eni.

‘Oku mahino pe foki koe mafai ki hono feliuliuaki ‘a e founga fili ‘oku nofo pe ia ‘i he Komisoni Fili pea ‘e ‘ikai ha fu’u liliu lahi ki he Konisitūtone mo e Lao kapau ‘e tali ke foki ki he founga motu’a.