Toloi hopo Lord Tu’ivakano: Fokotu’u ‘e he Loea ‘a e Faka’iloa ‘ikai ha keisi ke fai ai ha hopo Featured
1 'Aokosi, 2018. Kuo toe toloi ‘a e hopo ‘a Lord Tu’ivakano ‘i he Fakamaau’anga Polisi ‘i he ‘aho Monite 30 Siulai ki he ‘aho 9 ‘Akosi ‘a ia ko e Tu’apulelulu ia ‘o e uike kaha’u.
Ko hono toutou toloi foki ‘a e hopo ko’eni kae malava ke fakahu mai ‘e he ongo tafa’aki ‘a ‘ena ngaahi ngaue fakapepa ‘o fakatatau ki he fiema’u ‘a e Fakamaau’anga.
Na’e hili hono tufa mai ‘a e ngaahi pepa mei he tafa’aki ‘a e Talatalaaki pea nae fokotu’u atu mei he Fakafofonga Lao ‘a Lord Tu’ivakano ko William Clive Edwards ‘i he ngaahi pepa ki he Fakamaau’anga ‘oku ‘ikai ha keisi ia ke fai ai ha hopo.
Ko e fokotu’u ko’eni ‘i he taukapo ma’a e Faka’iloa fekau’aki mo e faka’ilo ‘o e Faka’iloa ki he ngauehala ‘aki hono mafai ke ma’u ha paasipooti, totongi fakafufuu ‘o ha ‘Ofisa Ngaue Faka-Pule’anga, Fe’ave’aki Pa’anga ‘Uli (Money Laundering) mo e Fukava Loi.
‘Oku ‘amanaki foki ke hoko atu ‘a e hopo ko’eni ‘i he ‘aho Tu’apulelulu 9 ‘Akosi ‘a ia koe uike kaha’u ia ke fakahoko ‘a e alea ‘a e ongo tafa’aki fekau’aki mo e ngaahi fokotu’u fakalao kuo fakahu atu ki he Fakamaau’anga.
‘Oku fakafofonga’i ‘a e Talatalaaki ‘e he ‘Ofisi ‘o e ‘Ateni Seniale pea ko William Clive Edwards Sr. ma’a e Faka’iloa Lord Tu’ivakano.
