Tapou ki he toe fu’u vela ange ‘a e ‘ea ^Featured

‘Oku makatu’unga ‘eni mei he fu’u mafana ange ‘a e ‘ea he ngaahi ‘aho ni pea ‘oku a’u ‘eni ‘i he uike ni ki he Tikili Selisiasi ‘e 33 ‘a ia ‘oku lekooti eni ki he mafana taha ‘i he ngaahi ta’u mai ki mui ni.

‘Oku mahino mai foki mei he fakamatala mei he va’a fakamatala’ea koe mafana taha ‘i he ta’u 2016 koe Tikili Selosiasi ‘e 30 ‘a ia ‘oku mahino mai ‘a e toe fu’u mafana ange ‘a e ‘ea.

Na’e tapou foki ‘e ‘Akau’ola ke fai hano tokangaekina ‘o e kau vaivai, kau faingata’a’ia, fanau iiki pehe ki he kau folau mei muli ‘oku fo’ou kiate kinautolu ‘a e ‘ea ‘o kau kiai ‘a kinautolu ‘oku ma’u ‘e he mahaki suka.

Na’e fakaha foki ‘e ‘Akau’ola ki he ongoongo ‘a e Letio Tonga ‘a e malava ke hanga ehe ‘ea ko’eni ‘o fakatupu ‘a e maha he vai mei he sino (dehydration) ‘o tupu mei ai ‘a e faingata’ia faka-sino.

Na’e tuku mai ha fakatokanga kiate kinautolu ‘oku ngaue ‘i he la’a kenau tui hanau tataa, ngaue’aki ‘a e fakamalu mo e ngaahi kilimi ki he la’a pea ke inu ‘a e vai ke lahi.

‘Oku ‘ilonga lahi foki ‘a e vela ange ‘a e ‘ea he tokolahi ‘a e kakai ‘oku nau nofo ki he ngaahi matatahi pehe ki hono fakataua ‘a e ngaahi ii ‘uhila (electrical fans) mei he ngaahi falekoloa ‘i he fonua.

‘I ha fakamatala mei he kau mataotao ki he fakamatala'ea ‘oku kaungatonu ‘a e vela ko'eni mei he feliuliuaki fakamamani lahi ‘a e ‘ea (Climate Change.