Tohi Tangi ke Fakahifo ‘a ‘Akilisi Pohiva mo ‘Etuate Lavulavu mei he Potungāue Ako Featured
Samuela 'AKilis Pohiva & 'Etuate S. Lavulavu
Nuku'alofa, 12 'Okatopa 2015. ‘Oku ‘amanaki ke fakahū atu ha Tohi Tangi ‘a e kakai, ngaahi kulupu, kau ako, kau mamahi’i ako, kau faiako mo e ngaahi kupu fekau’aki mo e ako ‘i he fonua ni ‘a ‘enau tohi Tangi ki he 'Ene 'Afio fekau’aki mo ‘enau ta’efiemālie ki hono tataki ‘e he Palēmia ka koia ‘oku Minisitā Ako ‘a e Potungāue Ako mo e Ako ‘i he fonua.
‘Oku kau atu foki he Tohi Tangi ko’eni mo ‘enau ta’efiemalie ki hono toutou fakamafai’i ‘o ‘Etutae Lavulavu kene le’ole’o he lakanga Minisitā Ako.
‘Oku makatu’unga ‘a e Tohi Tangi ko’eni ‘i he ta’efiemalie ki hono fakalele mo tataki ‘o e ako ‘i he fonua ni pea mo e kaunga tonu kiai ‘a e Minisitā Ako ka ko e Palēmia pehē kia ‘Etuate Lavulavu ka ko’ene Minisitā ‘oku toutou fakamafai’i kene le’ole’o he lakanga ni he taimi ‘oku mama’o ‘ai ‘a e Palēmia mei he fonua.
‘Oku fakahisitolia ‘a e Tohi Tangi ko’eni he ko hono toki fuofua fakahoko ‘eni ha Tohi Tangi natula pehe ni fekau’aki mo hono fakalele mo tataki ‘o e ako he fonua ni pea fiema’u ke fakahifo ‘a e Minisitā mo e Minisitā ‘oku ne nima’aki ke vaka atu ai ‘ene ngaahi tu’utu’uni he taimi ‘oku mavahe ai mei he fonua.
Ko e kaveinga pelepelengesi ‘a e ako ki he fonua tautautefito ki Tonga ni mo e tu’unga ma’olunga ‘oku ‘i ai ‘a e ako ka kuo hoko ai ‘a e fehulunaki lahi ‘i he ngaahi ‘aho ni.
‘Oku ‘amanaki ke fakahoko ‘i he ‘aho ni ha Konifelenisi ‘a e Komiti ‘oku nau ngāue ki he Tohi Tangi ni mo e kau faiongoongo ‘i he Loki Konifelenisi ‘o e Pasilika ‘o Sangato ‘Atonio Patua ‘i he taimi 4:00 PM Efiafi ‘o e ‘aho ni 'aho 12 'Okatop 2015 pea ‘oku fakafofonga’i mai ‘a e Komiti ngāue ki he Tohi Tangi ‘e ‘Emelī Pouvalu ka koe mataotao ‘i he mala’e ako mo e Pule Lahi (CEO) malōlō‘a e Potungaue Ako ‘a Tonga.
