Manakoa & Fakataua Tohi Fo'ou 'a Palofesa Dr Tevita O. Ka'ili Featured
Palofesa Dr Tevita O. Ka'ili
30 Me, 2018. Na'e manakoa mo tautaufa'oa 'e he kau sikola he konifelenisi 'a e Native American & Indigenous Studies Association (NISA) (Kautaha Ako & Fakatotolo ki he Ngaahi 'Ilo [moe Poto] 'a e Kakai Tu'ufonua 'o 'Amelika) na'e fai 'i Yaanga 'i Los Angeles, Kalefonia, 'Amelika, 'i Me 2018, 'a e toenga 'o e fua paaki 'a e tohi fo'ou ko e "Marking Indigeneity: The Tongan Art of Sociospatial Relations" (Faka'ilonga'i 'a e ['Ilo mo e Poto] Tu'ufonua: Ko e 'Aati / Faiva Faka-Tonga 'o e Tauhiva" 'a Palofesa Dr Tevita O. Ka'ili.
Na'e fua paaki foki ha ngaahi tatau 'e lauiafe lahi 'a e tohi ni 'e he fale faipulusi faka'univesiti 'iloa ko e University of Arizona Press 'o e 'Univesiti 'o 'Alisona 'i 'Amelika he ta'u 2017, 'a ia na'e kamata mei ai hono tu'uaki mo 'ota mo fakatau atu ki he ngaahi feitu'u kehekehe 'i mamani ka e tautefito ki he ngaahi 'univesiti mo e ngaahi laipeli mo e kau fekumi mo e kau ako tokolahi, 'o toki tautaufa'aoa faka'osi hono manakoa mo fakataua 'e he kau sikola he lolotonga 'a e konifeenisi 'a e NISA.
Na'e kau lahi 'a e manakoa mo e fakataua 'o e tohi ni hono ngaue'aki lelei 'e he tufunga tohi 'a Palofesa Dr Ka'ili 'a e filosofia / teolia fo'ou mo makehe 'a e ta-va 'o e 'iai (new ta-va [time-space] philosophy / theory of reality), 'o "ta" hono faka'ilonga'i mo fakafuo 'a e 'ilo mo e poto tupu'a ka e ka e "va" 'a e 'ilo mo e poto (mo e uho), 'a ia ko e 'aati / faiva 'o e tauhiva. 'Oku kau 'a e ta mo e va he 'ilo mo e poto loloto tu'ufonua 'a e Moana 'Osenia / Pasifiki mo Tonga.
'Oku lolotonga takimu'a foki 'a Palofesa Dr Ka'ili mo Hufanga Palofesa Dr 'Okusitino Mahina fakataha mo ha kau sikola tokolahi 'i mamanilahi hono taukave 'a e filosofia / teolia fo'ou 'a e ta-va 'o e 'iai, 'a ia kuo mafola mo movete hono kaupeau he ngaahi mala'e kehekehe mo e ngaahi 'univesiti kehekehe lahi 'i mamanilahi. Na'e tufunga foki 'e Hufanga Palofesa Dr Mahina 'a e talamu'aki 'o e tohi ni.
'Oku teuaki 'e he fale faipulusi 'a e University of Arizona University Press ke to e paaki ha ngaahi tatau lahi tatau 'o e tohi matu'aki ma'uhinga mo 'aonga ni, 'a ia 'e to e totongi ma'ama'a ange foki 'i Sepitema 2018, 'a ia 'oku ton e ma'ama'a ange hono ma'uhinga mo e totongi fakapa'anga, 'a ia 'e fakatou takafi molu (softcover) ki he$20-00 ki he taha mo e takafi fefeka (hardcover) ki he $50-00 ki he taha.
