Hopoki Tama Pilinisi Kalauni MV Maggie Cat fetongi fakataimi MV ‘Otu Anga’ofa Featured
MV Maggie Cat 'i he Uafu Kuini Sālote
30 ‘Aokosi 2016. Na’e lava lelei he efiafi ‘o e ‘aho ni hono hopoki ‘e he Tama Pilinisi Kalauni Tupou To’a ‘Ulukalala ‘a e MV Maggie Cat ‘a ia koe vaka ia mei ‘Aositelēlia ‘a e Kautaha Captain Cooks Cruises ‘oku haea mai ‘e he Kautaha Vaka ‘Otumotu Anga’ofa (Friendly Island Shipping Agency) kene fetongi fakataimi ‘a e ‘Otu Motu Anga’ofa.
Ko e lava ‘aki foki ‘eni ‘a e mahina ‘e 4 ‘a e ‘ikai toe faifatongia ‘a e ‘Otu Motu Anga’ofa makatu’unga ‘i ha maumau fakatekinikale ‘oku hoko kiai.
‘Oku ‘amanaki foki ke folau atu ‘a e MV ‘Otu Motu Anga’ofa ki Fisi ke fakahoko ai hano toho mo fakahoko hano fetongi ‘a e konga ‘oku maumau lolotonga ia ‘e kamata ‘i he ‘aho Pulelulu 31 ‘o ‘Aokosi ‘a ia ko e Pulelulu ia ‘o e uike ni ‘a e ‘uluaki folau ‘a e vaka ni ki Tokelau.
‘Oku fakafuofua fakatatau ki he fakamatala ‘a e Fakatou ‘e folau houa ‘e nima mei Nuku’alofa ki Pangai pea houa ‘e 4 ki he nima mei Pangai ki Neiafu Vava’u. Ko e vaka foki ko’eni ‘oku pasese 260 tupu pea koe uta ‘oku fua pe ‘o hange ha folau vakapuna ‘o taki kilo ‘e 15 ki he pasese.
Ko e ngaahi uta lalahi hange koia ko e angamaheni ‘a e folau tahi ‘i Tonga ni ‘e toki fakafolau atu pe ia he Niuvākai ‘a ia ko e vaka pe moia ‘o e he Kautaha Vaka ‘Otumotu Anga’ofa (Friendly Island Shipping Agency).
Na’e me’a foki 'i he ouau ni mo e Ta’ahine Pilinisesi Sinaitakala Tuku’aho, Minisitā Ki he Ngaahi Pisinisi ‘a e Pule’anga Poasi Tei mo e kau fakaafe tokolahi.
