“ Malo fau pea ko e tanaki pe 'eni ki he talave malie atu kuo 'ohake. 'Oku 'iloa foki 'a e motu ko Hunga 'i Vava'u mo e motu ko Kotu 'i Ha'apai he ngaahi faiva mo e tufunga tu'ufonua kehekehe, 'a ia 'oku kau ai 'a e faiva faifolau, faiva tau, faiva ta'anga, faiva hiva, tufunga lea, faiva lea, faiva ako mo e ha fua, 'o hange ko e faiva fuhu na'e 'iloa ai 'a Kitione Lave mo e faiva ako mo e tufunga fa'utohi 'oku 'iloa ai 'a Palofesa Epeli Hau'ofa, Dr Melenaite Taumoefolau, Sione Tu'itahi mo e tokolahi kehe, 'o kau ai 'a e faiva fakaoli mo e ha fua. 'Oku lotolotonga faiako mo fekumi foki 'a e mokopuna 'o Kitione ko Dr Krushil Watene he mala'e 'o e filosofia he 'Univesiti 'o Mesi 'i Palmerston North 'i Aotearoa Nu'usila, 'a ia ko e 'ofefine 'o Patricia mo hono mali mei he kau Watene mei he matakali Mauli, 'a ia ko e 'ofefine 'o Kitione. Na'e fua ako pe 'a Dr Watene hono mata'itohi BA mo e MA he mala'e 'o e filosofia he 'Univesiti 'o 'Aokalani, pea ne toki hoko atu mo faka'osi he 'Univesiti 'o Sangato 'Anitelu [St Andrews University] 'i Sikotilani 'i Pilitania Lahi, 'o ma'u ai hono Toketa [PhD] he mala'e 'o e filosofia. ”