“ 'Oku tatau ai pe, pe na'e siolalo pe sio'olunga 'ae 'Ikale Tahi koe timi faiva 'akapulu fakafonua 'a Tonga he fe'auhi kihe Ipu 'a Mamani he Faiva 'Akapulu koe fehu'i ma'uhinga heni: Na'e fakahoko lelei nai 'ehe 'Ikale Tahi he'enau fe'auhi faiva tau'akapulu mo Geogia hono faiva'i 'ae pulu honau sino, 'aia ko hono matutefua koe "fakahu" 'ehe sino 'ae pulu, 'o tatau pe ko hono fakahu ki loto he sikalamu, sikalamu mei loto ki tu'a kihe haafe, haafe kihe feesi, feesi kihe senita, senita kihe kapakau PE fakahu 'ehe kau foueti he molo moe ulaki PE fakahu he laini 'auti, 'aka fakato moe 'aka fakatotolo PE fakahu fakataha hono lele'i he vaa'iva'inga 'o tokoto he kolo mo 'aka fakahu he vaha'akolo moe ha fua?
Na'e makatu'unga heni 'ae malohi 'ae timi faiva 'akapulu 'a Siapani he timi faiva 'akapulu 'a Saute 'Afilika, 'o lahi ange hono fakahu tonu mo lelei 'ehe sino 'ae pulu 'ehe timi 'a Siapani, 'aia na'e lau ai honau "kai," 'o nau malohi he timi faiva 'akapulu 'a Saute 'Afilika, 'aia na'e si'i ange 'enau fakahu tonu mo lelei 'ehe sino 'ae pulu, 'o 'uhinga ai 'enau fo'i, 'aia koe si'i ange ia honau "kai."
Koe sio faiva tau'akapulu pe mei he tu'alini 'i Teufaiva,
'Ofa lahi moe hufaki.
(Fakatokanga'i ange: 'Oku 'ikai toe kehe 'ae faiva 'akapulu mei ha toe faiva, 'o hange koe faiva ta'anga/faiva ko hono fakahu 'ae heliaki he ongo vaa'i'uhinga, hiva ko hono fakahu 'ae tu'akauta he ongo vaa'ita, haka ko hono fakahu 'ae hola, kaiha'asi pe haka-funga-haka he ongo vaa'ihaka, kae toki ma'u 'ae potupotutatau moe malie -- 'o hange tofu pe ko hono fakahu 'ehe sino 'ae pulu he ongo vaa'iva'inga kae toki ma'u 'ae potupotutatau moe malie!) ”